სკანდალური აღიარება 4 წლის შემდეგ - მერაბიშვილის საკნიდან გაყვანა და სუბარ-ფარცხალაძის გარიგება

პოლიტიკა - 17:40, 12 Jul, 2017

44148

"რუსთავი 2"- ის გადაცემა "განსხვავებული აქცენტები" - 15 ივლისს, სასჯელაღსრულების სამინისტროს ყოფილ მაღალჩინოსანთან ექსკლუზიურ ინტერვიუს აანონსებს. გადაცემის ანონსში ჩანს, რომ ირაკლი კორძაია სკანდალურ განცხადებას აკეთებს და ამბობს, რომ 4 წლის წინ ვანო მერაბიშვილი საკნიდან ნამდვილად გაიყვანეს და შემდეგ აღნიშნული ვიდეო-კადრების გაქრობის გაქრობას ცდილობდნენ.

"მოსმენილი მქონდა უშუალოდ მომუშავე ხალხისგან, როგორ გაიყვანეს, ვინ გაიყვანა... შემდეგ რა ვქნათ, როგორ ვქნათ, რამენაირად უნდა დავმალოთ ვიდეო ჩანაწერის ამბავი"- აცხადებს კორძაია.

სასჯელაღსრულების ყოფილი მაღალჩინოსანი აღიარებს, რომ ჩანაწერები არც 24 და არც 48 საათის შემდეგ არ იშლება. კორძაია შაბათს 22:00 საათზე უპასუხებს კითხვებს ვინ გაანადგურა მერაბიშვილის საკნიდან გაყვანის ვიდეო კადრები და ვინ დაფარა დანაშაული.

"ფარცხალაძეს ხელისუფლებამ უამრავი ფული მისცა, დარბაისელმა უამრავი პრემია აიღო"- ამბობს კორძაია.

გადაცემის ანონსიდან ირკვევა, რომ ყოფილი მაღალჩინოსანი ამ საქმეში სამინისტროს ყოფილ მინისტრს, სოზარ სუბარს ადებს ხელს.

"სოზარ სუბარი იყო ერთ-ერთი, მთავარია ის, რომ ეს ყველაფერი კანცელარიის დონეზე წყდებოდა"- აღნიშნავს ირაკლი კორძაია, რომელიც დღეს საფრანგეთში იმყოფება.

ყოფილი პრემიერ-მინისტრი ვანო მერაბიშვილი 4წლის წინ აცხადებდა, რომ საკნიდან მაშინდელი მთავარი პროკურორის, ოთარ ფარცხალაძის დავალებით გაიყვანეს, გაყვანის მიზეზი კი, გახმაურებულ საქმეებზე, მათ შორის ზურაბ ჟვანიას გარდაცვალებისა და საქართველოს ექსპრეზიდენტის ფინანსური საქმიანობის საქმეებზე ჩვენებების მიცემას აიძულებდნენ.

ეს ეპიზოდი ვანო მერაბიშვილთან დაკავშირებით სტრასბურგის სასამართლოს 14 ივნისის გადაწყვეტილებაშიც მოხვდა.