მცოცავი ოკუპაცია და ანექსია - საქართველოს მთავრობის წევრებმა აღნიშნულ საკითხზე მთავრობის სხდომის დასრულების შემდეგ ისაუბრეს. მმართველი გუნდის წევრები აცხადებენ, რომ ოკუპაციის შესახებ კანონი არ გაუქმდება, თუმცა, ხელისუფლებაში არ გამორიცხავენ, რომ ადგილობრივი მოსახლეობის ინტერესებიდან გამომდინარე კანონში გარკვეული ცვლილებები სამომავლოდ შევიდეს.

„არ იგეგმება საქართველოს ოკუპირებული ტერიტორიების შესახებ კანონის გაუქმება, ვიდრე მიმდინარეობს საქართველოს ტერიტორიების ოკუპაცია, არ არის გამორიცხული, მომავალში ჩვენ ვიმუშაოთ გარკვეულ ცვლილებებზე, რომელიც მიმართული იქნება ადამიანების ყოფის შემსუბუქებისაკენ, იმიტომ რომ პრინციპი ამ კანონის გახლავთ - ერთი მხრივ, ოკუპაციის წინააღმდეგ სამართლებრივი ინსტრუმენტის არსებობას და ეს იარსებებს და მეორე მხრივ მის ამოცანას არ წარმოადგენს ადამიანების წინააღმდეგ რაიმე ქმედების განხორციელებას,“ - განაცხადა საქართველოს სახელმწიფო მინისტრმა შერიგებისა და სამოქალაქო თანასწორობის საკითხებში, ქეთევან ციხელაშვილმა.