"ოცნების სახის დაკავებამ მაფიოზურ-კლანურ მმართველობას ფარდა ახადა"- ხატია დეკანოიძე კორუფციის ფაქტებზე საუბრობს

პოლიტიკა - 13:53, 12 Jul, 2017

2995

”ერთიანი ნაციონალური მოძრაობის” ერთ-ერთი ლიდერი ხატია დეკანოიძე "ნიუპოსტთან" საუბრისას ამბობს, რომ ოთარ აბესაძის კორუფციული საქმიანობა თბილისის მერიაში გამონაკლისი არ არის.

ოპოზიციის წევრი აცხადებს, რომ მმართველი პოლიტიკური ძალა კორუფციის სახელთან ასოცირდება, დედაქალაქის მერიის წარმომადგენლის დაკავებამ კი საქართველოში არსებულ მაფიოზურ-კლანურ გადანაწილებას ფარდა ახალა.

"ქართული ოცნების ერთ-ერთი სახის, ოთარ აბესაძის ქრთამის აღების ფაქტზე დაკავება ადასტურებს იმას, რომ თბილისის მერიაში და ყველა სახელმწიფო სტრუქტურაში კორუფცია სიღრმისეულადაა ფესვგადგმული. დაწყებული ზედა ეშელონებიდან, დამთავრებული ქვედა ეშელონებამდე კორუფციის შრეებია. ჩვენ დიდი ხანია ვსაუბრობთ იმაზე, რომ დედაქალაქის მერიაში ადამიანები ყველა მომსახურებაში ფულს იხდიან და ის ადამიანები, რომლებიც ქართული ოცნებიდან მერიაში მოვიდნენ არა საქმის საკეთებლად, არამედ იმიტომ რომ საკუთარი ჯიბე გაისქელონ, დაასაქმონ ნათესავები და აკეთონ ფული" - განაცხადა "ნიუპოსტთან" ხატია დეკანოიძემ.

მისი თქმით, ოთარ აბესაძის დაკავებამ "ფარდა საბოლოოდ ახალა მაფიოზურ-კლანური გადანაწილების სქემას, რომელიც ქართულმა ოცნებამ დაამკვიდრა".

"ეს არის ერთი ასპექტი, მინდა შეგახსენოთ გოგაშვილისა და ფარცხალაძის საქმეები, რომლებიც მილიონერები გახდნენ. გოგაშვილი, რომელიც სოციალურად დაუცველის სტატუსით სარგებლობდა 2 წელიწადში, მოსახლეობის ხარჯზე ასკუპტდა და მილიონერად გვევლინება. თუმცა ამ პირებით გამოძიება არც კი დაინტერესებულა. იგივე ხდება რუსთავი 2 - ის მოსამართლის ოჯახისთვის გადაცემული მიწის ნაკვეთთან დაკავშირებით. სამართალდამცავები ამ შემთხვევებზე დუმან და დამნაშავეები თავისუფლად დადიან"- განმარტა ენმ-ს ერთ-ერთმა ლიდერმა.

თბილისის მერიის თანამშრომელი, ოთარ აბესაძე ქრთამის აღების ფაქტზე დააკავეს. მას სასჯელის სახით ექსიდან ცხრა წლამდე თავისუფლების აღკვეთა ემუქრება. გამოძიება საქართველოს სსკ-ის 338-ე მუხლის პირველი ნაწილით გათვალისწინებული დანაშაულის ნიშნებით მიმდინარეობს.

ოთარ აბესაძე საზოგადოებამ კოალიცია “ქართული ოცნებიდან” გაიცნო. ის პარტიის ახალგაზრდული ორგანიზაციის ხელმძღვანელი იყო. სხვადასხვა დროს განათლების მინისტრრების მრჩევლადაც მუშაობდა. 2017 წლიდან დღემდე კი საკრებულოში თბილისის მერიის წარმომადგენლად მუშაობს.