"გვახსოვს კახი კალაძის კლანური მმართველობა თბილისის მერიაში"- საკრებულოს წევრები აბესაძის დაკავებას აფასებენ

პოლიტიკა - 12:13, 12 Jul, 2017

5036

საკრებულოს ოპოზიციონერმა წევრებმა მერის წარმომადგენელის ოთარ აბესაძის დაკავებას საკრებულოს ოპოზიციური პარტიები უკვე გამოეხმაურნენ.

ფრაქცია ”ერთიანი ნაციონალური მოძრაობის” წევრი მარინა დათუკიშვილი თემის შეფასებისას ამბობს, რომ აბესაძის დაკავება არ უკვირს, ის დედაქალაქის მთავრობაში კახა კალაძის ცოლის ძმის საქმიანობას და ქრთამის აღებისთვის მერიისა და გამგეობის თანამშრომლების დაკავებას იხსენებს.

„ჩვენ გვახსოვს კახი კალაძის კლანური მმართველობა თბილისის მერიაში, რომელიც არაერთგზის აღვნიშნეთ და ბოლოს მივაღწიეთ იმას, რომ მისი ცოლის ძმა, რომელსაც დიპლომი არ ჰქონდა და კურირებდა განათლების სამსახურს გაშვებული ყოფილიყო თბილისის მერიიდან, ჩვენ გვახსოვს გამგებლის მოადგილეები, რომლებმაც 50 ათასი ლარის ოდენობის ქრთამი აიღეს თბილისის მერიასა და თბილისის გამგეობებში და დღეს უკვე ვხედავთ ჩვენს ოთარ აბესაძეს. ოთარ აბესაძე არ გახლავთ რიგითი წევრი "ქართული ოცნების," ოთარ აბესაძე გახლავთ ერთ-ერთი გამორჩეული სახე „ქართული ოცნების“ და მერიის წარმომადგენელი ქალაქ თბილისის საკრებულოში,“-აცხადებს მარინა დათუკიშვილი.

თბილისის საკრებულოს დამოუკიდებელი დეპუტატი ალეკო ელისაშვილი. ოთარ აბესაძის და დავით ნარმანიას პირად მეგობრობაზე ამახვილებს ყურადღებას.

„ის იყო და არის უახლოესი მეგობარი დავით ნარმანიასი და ყოველთვის ლაპარაკობდა ის პირადად ნარმანიას სახელით, საჯაროდ და ოფიციალურად და აღმოჩნდა რომ ის იყო ჩვეულებრივი მექრთამე. ის რომ მერია არის გახრწნილი კორუფციით და რომ გავიძახი, უბრალოდ მე ოპერატიული მუშაკი არ ვარ რომ ფაქტზე დავიჭირო ხალხი თორემ ეს ინფორმაცია ყოველთვის მომდის. მათ შორის მესმოდა აბესაძეზეც, რომ ხელს აფათურებდა ძალიან ბევრ რამეში და დადასტურდა კიდეც,“-აცხადებს ალეკო ელისაშვილი.

შეგახსენებთ, რომ ოთარ აბესაძე სუს-ის თანამშრომლებმა ქრთამის აღების ბრალდებით დააკავეს.