საოკუპაციო ხაზთან განახლებულ მცოცავ ოკუპაციასა და გიორგი გიუნაშვილის უკანონო პატიმრობას გააპროტესტებს დღეს ქართული მხარე სოფელ ერგნეთში, ინციდენტების პრევენციისა და მათზე რეაგირების მექანიზმის სამუშაო ჯგუფის შეხვედრაზე, რომელიც სულ ცოტა ხნის წინ დაიწყო.

როგორც „ნიუპოსტის“ კორესპონდენტი ადგილიდან იტყობინება, შეხვედრის დაწყებამდე მხოლოდ საქართველოს დელეგაციის წარმომადგენელმა გააკეთა კომენტარი, ე.წ. სამხრეთ ოსეთის დელეგაციის წარმომადგენლებმა კი ჟურნალისტებთან საუბარი არ ისურვეს. ქართულ მხარეს სახელმწიფო უსაფრთხოების სამსახური წარმოადგენს, როგორც უწყების ხელმძღვანელის მოადგილემ, კახა ქემოკლიძემ განაცხადა, შეხვედრაზე დააყენებენ სოფელ ბერშუეთში ე.წ. საზღვრის მანიშნებელი ბანერების უკანონო მონტაჟისა და გასული წლის ივნისში დაკავებული გიორგი გიუნაშვილის გათავისუფლების საკითხს. ცხინვალში დაკავებულ გიორგი გიუნაშვილს დე ფაქტო სასამართლომ 20 წლით პატიმრობა შეუფარდა. ოჯახი დახმარებას ითხოვს. მარიონეტული რეჟიმის მტკიცებით, ის დივერსიულ-ტერორისტულ საქმიანობაშია ეჭვმიტანილი.