"რაც დიალოგი დავიწყეთ, აღდგა ვაჭრობა რუსეთთან"- რა შედეგები მოიტანა "პრაღის ფორმატმა"

პოლიტიკა - 16:43, 10 Jul, 2017

2552

პრემიერის სპეციალურმა წარმომადგენელმა რუსეთთან ურთიერთობების საკითხებში ზურაბ აბაშიძემ დღეს გამართულ პრესკონფერენციაზე პრაღაში მისი და გრიგორი კარასინის შეხვედრების შედეგები შეაჯამა და განაცხადა, რომ „პრაღის ფორმატის“ შედეგია მილიარდი დოლარის ღირებულების ექსპორტი, აღდგენილი სატრანსპორტო კომუნიკაცია და გათავისუფლებული პატიმრები.

„ამ ფორმატს აქვს ძალიან კონკრეტული მანდატი და შემოიფარგლება კონკრეტული საკითხებით სავაჭრო-ეკონომიკური ურთიერთობები, სატრანსპორტო კომუნიკაციები, ჰუმანიტარული პრობლემები. მას შემდეგ რაც, ეს დიალოგი დავიწყეთ და აღდგა ვაჭრობა რუსეთთან, გაიხსნა რუსეთის ბაზარი. ჩვენი ექსპორტი რუსეთის ბაზარზე 2013 წლამდე იყო - 0, რუსეთისა, ყოველწლიურად დაახლოებით 500 მილიონი დოლარის ღირებულების პროდუქცია ქართულ ბაზარზე. ასეთი დისბალანსი იყო. ამ წლების მანძილზე, საქართველოდან რუსეთში გავიდა მილიარდამდე საფასურის ქართული პროდუქცია, ეს არის ექსპორტი. ამან ხელი შეუწყო გარკვეული ჰუმანიტარული პრობლემების მოგვარებას.

ჩვენი ქვეყნის რვა მოქალაქე, რომელიც იხდიდა მრავალწლიან სასჯელს ჯაშუშობის ბრალდებით რუსეთში, გავათავისუფლეთ. ისინი საქართველოში არიან, ოჯახებს დაუბრუნდნენ. მათ კიდევ რამდენიმე წელი ელოდათ რუსეთის საპატიმროებში ყოფნა.“- განაცხადა ზურაბ აბაშიძემ.