"ბანერების აღმართვას მიზანია, რომ ქართულმა მხარემ დაიწყოს მოლაპარაკებები ოსეთის დე ფაქტო ხელისუფლებასთან"- აბაშიძე

პოლიტიკა - 16:30, 10 Jul, 2017

4357

საქართველოს პრემიერ-მინისტრის სპეციალური წარმომადგენლის ზურაბ აბაშიძის განცხადებით, ოკუპანტების მიერ ე.წ საზღვრის აღმნიშვნელი ბანერების აღმართვის მიზანი, არის ის რომ საქართველო აიძულონ ე.წ სამხრეთ ოსეთის დეფაქტო ხელისუფლებასთან ე.წ. საზღვრის დემარკაციაზე საუბარი დაიწყოს. აბაშიძის თქმით საქართველო დეფაქტო ხელისუფლებასთან მოლაპარაკებას არ დაიწყებს და პროცესის შეჩერებას საერთაშორისო თანამეგობრობის მხრიდან ზეწოლით ეცდება:

„ამ ბანერების აღმართვას აქვს ერთ-ერთი მიზანი, რომ აიძულოს ქართული მხარე რომ დაიწყოს საუბარი ოსეთის დე ფაქტო ხელისუფლებასთან ე.წ საზღვრის დემარკაციაზე. რაც ჩვენთვის აბსოლუტურად მიუღებელია. არ არის გამორიცხული, რომ ეს პროცესი გაგრძელდეს ჩვენ ვერანაირად ვერ დავიწყებთ დე ფაქტო ხელისუფლებასთან ამაზე რაიმე სახის მოლაპარაკებებს. გავაგრძელებთ და მაქსიმალურად შევეცდებით, ჩვენი მხრიდან საერთაშორისო თანამეგობრობის, ჩვენი დასავლელი პარტნიორების ზეწოლით ეს პროცესი შეჩერდეს, შეწყდეს და დაიწყოს ამ პრობლემების მოგვარება. ამას საქართველოს ხელისუფლება ცდილობს ყოველდღიურ რეჟიმში ცდილობს.ეს პრობლემები, რომელიც ასეთი მძიმე ფორმით შეიქმნა და მოსდევს 2008 წლის ომს და მისი შედეგია მნიშვნელოვანწილად, არის ჩვენი საგარეო პოლიტიკის მთავარი სამიზნე, რათა მოხდეს მათი მინიმიზირება და ეტაპობრივი მოგვარება.“- განაცხადა ზურაბ აბაშიძემ.