,,ბრეგაძე-სადღობელაშვილები რუსული პროპაგანდის ინსტრუქციებს სარფიანად ასრულებენ“

პოლიტიკა - 15:10, 10 Jul, 2017

1302

თბილისში დაგეგმილ ე.წ. ქართულ მარშს წერილით ეხმაურება მოძრაობა ,,დაბრუნების“ თავმჯდომარე მალხაზ პატარაია.

,,14 და 16 ივლისს ხელისუფლების მარბიელი შავრაზმელები აპირებენ ე.წ. ,,ქართულ მარშს“ თბილისსა და ბათუმში რუსული ანალოგით და დაკვეთით. ასეთი მარშები რეგულარულად იმართება რუსეთის ქალაქებში ,,რუსული მარშის“ სახელწოდებით, რომელსაც მთავრდება ეთნიკური ანგარისწორებით და მსხვერეპლით, მათ შორის ქართველების მიმართაც.

არალეგალური იმიგრაცია ყველა დასავლური სახელმწიფოსათვის აქტუალური საკითხია, მას გააზრებულად, სიფრთხილით ეკიდებიან და ხელისუფლების პასუხისმგებლობაა. ამავე დროს ყველგან კარგად ესმით, რომ ამ თვალსაზრისით რაიმე სახის ეთნიკური დიფერენციაცია დაუშვებელია, რადგან ასეთი მიდგომა სრულიად ერთმნიშვნელოვნად არის რასიზმი და დისკრიმინაცია.

გამოცხადებული ფაშისტურ-კრემლოიდური დებოში სოციალური შუღლის გაღვივებისაკენ მიმართული რუსული პროპაგანდის კიდევ ერთი აქციაა, რომლის მიზანიც არის ეროვნული გრძნობების სიმულაციითა და კრიმინალური ფაქტების ხელოვნურად გაზვიადებით რეალური პრობლემებიდან, უპირველესად ოკუპაციის აქტუალური საკითხებიდან ფსევდოპრობლემებზე საზოგადოებრივი აზრის გადატანა; ფუნდამენტალისტურ-იზოლაციონალისტური, ბოლშევიკური ცნობიერების გაძლიერება; ეთნიკური და რელიგიური დაპირისპირებების კერების, ახალი მტრის ხატის შექმნა; შეტევა დასავლურ ღირებულებებზე და ქვეყნის საერთაშორისო დისკრედიტაცია.

რაც ჩამოვთვალეთ, სავარაუდოდ, ხელისუფლებისა და ყველა რუსეთუმე ორგანიზაციისათვის გაცემული ინსტრუქციის თეზისებია. ბრეგაძე-სადღობელაშვილები და მისთანები გულმოდგინედ და საფიქრებელია, საკმაოდ სარფიანადაც სწორედ ამ მითითებებს ასრულებენ.

რა თქმა უნდა, ნორმალურ ქვეყანაში ეს ჯგუფები ასეთ გაქანებას ვერ მოიპოვებდნენ. ფიზიკური ანგარიშწორების ღია მუქარის შემცველი მათი აშკარად აგრესიული განცხადებები და სიძულვილის რიტორიკა იმთავითვე მიიქცევდა სამართალდამცავი ორგანოების ყურადღებას და ეს ანონსიც არ იქნებოდა საყურადღებო. მაგრამ მათგან რეალური საშიშროება მომდინარეობს, რადგან ამ და სხვა მსგავს საქმეებში ხელისუფლება და მისი ძალოვანი სამსახურები უმაგრებენ ზურგს. არანაკლებ გასათვალისწინებელია საქართველოს საპატრიარქოში ქორეპისკოპოს იაკობის მეთაურობით მოქმედი ხელისუფლებასთან დაახლოებული ასეთივე შავრაზმელ-რუსეთუმეთა ჯგუფი, რომელსაც დღეს დომინანტური მდგომარეობა უკავია და მნიშვნელოვანი გავლენა აქვს როგორც სასულიერო პირებზე, ისე მორწმუნეებზე.

აქციის ვითომ ორგანიზატორები, პოლიტიკური და საზოგადოებრივი ცხოვრებისათვის რეალურად მარგინალური სუბიექტები ვერავითარ მარშს თუ სხვა სახის რაიმე წონად ღონისძიებას დამოუკიდებლად ვერ მოაწყობენ. ამისთვის მათ არავითარი რესურსი არ გააჩნიათ. მაგრამ ხელისუფლებასა და რელიგიურ ფუნდამენტალისტ-რუსეთუმეთა მხარდაჭერის გამო, ამჯერად ქვეყნის უსაფრთხოებისა და წესრიგისათვის სერიოზულ საფრთხეს წარმოადგენენ.

ჩვენ მოვუწოდებთ ქართულ საზოგადოებას არ აჰყვეს ამ მეტად საშიშ მოწოდებას, ხოლო დასავლურ პოლიტიკურ და საზოგადოებრივ სპექტრს-მკაცრი რეაგირება მოახდინოს ხელისუფლებისაგან წაქეზებული და მხარდაჭერილი კოლაბორაციონისტების მორიგ თავხედურ გამოხტომაზე“ - წერს მალხაზ პატარაია.