აფგან მუხთარლის ჯანმრთელობის მდგომარეობა გაუარესდა

პოლიტიკა - 14:46, 10 Jul, 2017

1262

აზერბაიჯანელი ჟურნალისტის აფგან მუხთარლის ჯანმრთელობის მდგომარეობა გაუარესდა, ამის შესახებ ინფორმაციას მისი მეუღლე და ადვოკატი ავრცელებენ. ლეილა მუსტაფაევას თქმით გატაცების დროს აფგან მუხთარლის მკერდის არეში ძლიერად დაარტყეს. 10 დღის წინის ექიმმა ნახა და წამლები გამოუწერა, რომლებიც აქამდე არ მიუღია;

„ჩვენ არც კი გვეუბნებიან, რა წამლები გამოიუწერა ექიმმა, რომ მივაწოდოთ. მთელი ამ ხნის განმავლობაში მას მკერდში ტკივილები აწუხებს.“- განაცხადა მუსტაფაევამ. მისი თქმით მუხთარლიზე ფსიქოლოგიური ზეწოლა მიმდინარეობს, მას არ აძლევენ საკვების მაცივარში შენახვის ამ მისი გათბობის საშუალებას, ამიტომ მას რომელსაც ისედაც დიაბეტი ქონდა, კუჭის ტკივილებიც დაეწყო.

ადვოკატ ელჩინ სადიგოვის თქმით აფგან მუხტარლის არ აძლევენ უფლებას ტელეფონით დაელაპარაკოს საკუთარი ოჯახის წევრებს, რომლებიც საქართველოში არიან.

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, როგორც მისი ადვოკატის მიერ გავრცელებული ინფორმაციით ირკვევა, თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდნენ.