დასრულდა თუ არა საქართველო-სომხეთის საზღვრის დელიმიტაცია- რას აცხადებს საგარეო უწყება

პოლიტიკა - 18:04, 07 Jul, 2017

4125

საქართველო-სომხეთს შორის საზღვრის დელიმიტაციასთან დაკავშირებით სამუშაოების დასრულების შესახებ გავრცელებულ ინფორმაციას საქართველოს საგარეო საქმეთა სამინისტრო უარყოფს. როგორც „ნიუპოსტს“ უწყებაში განუცხადეს მორიგი სამუშაო შეხვედრა 2017 სექტემბერ-ოქტომბერში იგეგმება, ამ დრომდე კი შეთანხმებულია მხოლოდ სახელმწიფო საზღვრის გამავლობის დაახლოებით 70%.

„საქართველოს სახელმწიფო საზღვრის დელიმიტაციის კომისია აგრძელებს თავის მუშაობას სომხეთის შესაბამის კომისიასთან ორ ქვეყანას შორის საზღვრის დელიმიტაციის საკითხებზე. მორიგი სამუშაო შეხვედრა იგეგმება 2017 სექტემბერ-ოქტომბერში.

1995 წლიდან მოყოლებული, მხარეებმა შეათანხმეს სახელმწიფო საზღვრის გამავლობის დაახლოებით 70% და აგრძელებენ მუშაობას დარჩენილი მონაკვეთების შეთანხმების მიზნით, შესაბამისად წინასწარ შეუძლებელია განისაზღვროს როგორც ერთობლივი მუშაობის დასრულების კონკრეტული თარიღები, ასევე მისი შედეგები.“- აცხადებენ საგარეო უწყებაში.

შეგახსენებთ, გუშინ რამდენიმე მედიასაშუალებამ გაავრცელა ინფორმაცია, რომ საქართველოსა და სომხეთის რესპუბლიკას შორის საზღვრის დამდგენმა კომისიამ მუშაობა დაასრულა და ორ ქვეყანას შორის სადავო ტერიტორიად მიჩნეული ხუჯაბის სამონასტრო კომპლექსი სომხეთის ტერიტორიაზე აღმოჩნდა.