შეთანხმება საბაჟო მონიტორინგის შესახებ - რა შედეგით დასრულდა აბაშიძე-კარასინის შეხვედრა

პოლიტიკა - 17:12, 07 Jul, 2017

2267

პრაღაში საქართველოს პრემიერ-მინისტრის სპეციალური წარმომადგენლის რუსეთთან ურთიერთობების საკითხებში, ზურაბ აბაშიძისა და რუსეთის საგარეო საქმეთა მინისტრის მოადგილის გრიგორი კარასინის მორიგი შეხვედრაზე 2011 წელს გაფორმებული საბაჟო მონიტორინგის შესახებ შეთანხმების იმპლემენტაციაზე ისაუბრეს, აბაშიძის თქმით რუსული მხარე მზადყოფნას აცხადებს, რომ მოსამზადებელი ეტაპიდან უკვე იმპლემენტაციის ეტაპზე გადასვლა მოხდეს, რათა გაფორმდეს შესაბამისი კონტრაქტები შვეიცარიულ კომპანიასთან. მისი თქმით, კონტრაქტებს გააფორმებს როგორც ქართული, ასევე რუსული მხარე.

„მე დავაყენე საკითხი და სავარაუდო ვადებიც დავასახელე. პასუხი იყო, რომ მზად არიან ვადების დასახელებისთვისაც. მოდით, შვეიცარიელ კოლეგებთან წავიმუშაოთ ვადებზე და იმ ფორმის განსაზღვრაზე, როგორ მოხდება ტექნიკურად ამ კონტრაქტების გაფორმება. შვეიცარიელ კოლეგებს უნდა დავუკავშირდეთ, უკვე ჩამოვყალიბდებით ვადებზე და რა სახით რა ფორმით მოხდება ამ კონტრაქტების გაფორმება.“ - განაცხადა აბაშიძემ.

ზურაბ აბაშიძის განცხადებით, ქართულმა მხარემ ყველა შესაბამისი პროცედურა უკვე დაასრულა, თუმცა რუსულ მხარეს შვეიცარიულ კომპანიასთან დოკუმენტი არ გაუფორმებია.