"გამოიკვეთა, რომ გვაქვს რადიკალურად საპირისპირო მიდგომები"- რას აცხადებს აბაშიძე კარასინთან შეხვედრის შემდეგ

პოლიტიკა - 16:50, 07 Jul, 2017

3537

პრაღაში საქარველოს პრემიერ-მინისტრის სპეციალური წარმომადგენლის რუსეთთან ურთიერთობების საკითხებში, ზურაბ აბაშიძისა და რუსეთის საგარეო საქმეთა მინისტრის მოადგილის გრიგორი კარასინის მორიგი შეხვედრა გაიმართა. შეხვედრაზე 2011 წელს გაფორმებული საზაჟო მონიტორინგის შესახებ შეთანხმების იმპლემენტაციის საკითხის გარდა ერთ-ერთი მთავარი თემა ოკუპანტების მიერ უკანონო ბორდერიზაციის პროცესიც იყო. ზურაბ აბაშიძის თქმით აღნიშნულ საკითხთან დაკავშირებიტ გრიგორი კარასინის შეფასება იყო ის, რომ ეს საკითხი არა პრაღის, არამედ ჟენევის ფორმატში უნდა იქნეს განხილული. პრემიერი სპეცწარმომადგენლის თქმით კიდევ ერთხელ გამოიკვეთა, რომ ოკუპაციის თემასთან დაკავშირებით შეხვედრის მონაწილე მხარეებს რადიკალურად საპირისპირო მიდგომები აქვთ:

„მე მივეცი ჩვენი შეფასება იმ ფაქტებს, რაც ოკუპირებულ რეგიონებში და საოუპაციო ხაზზე ხდება. მისი რეაქცია გახლავთ, რომ ეს საკითხები ჟენევაში უნდა განვიხილოთ და აქ ამის ადგილი არაა. კიდევ ერთხელ გამოიკვეთა, რომ გვაქვს აბსოლუტურად საწინააღდეგო, რადიკალურად საპირისპირო მიდგომები ამ ვითარებასთან დაკავშირებით. მე ვთქვი, რომ ფონი რომელიც ჩვენი შეხვედრისათვის იქმნება არის ძალიან უარყოფითი.“- განაცხადა ზურაბ აბაშიძემ.

აბაშიძემ პრაღის ფორმატთან დაკავშირებით გამოთქმულ კრიტიკასაც უპასუხა და აღნიშნა, რომ ეს ფორმატი კომუნიკაციის საშულებაა და საქართველოს დასავლელი პარტნიორების მხრიდან მოწონებულია:

„ეს არის ქართულ-რუსული არაფორმალური დიალოგის ფორმატი, შეიძლება იყოს აბაშიძე, შეიძლება იყოს დოლიძე, იქაც შეიძლება იყოს კარასინი ან ივანოვი. მაგრამ კომუნიკაცია აუცილებელია. ამას ჩვენ ყოველთვის ვამოწმებთ ჩვენ დასავლელ პარტნიორებთან, თუ რას ფიქრობენ ისინი ჟენევის და პრაღის ფორმატებზე, მათი დამოკიდებულება არის ცალსახა, რომ ეს უნდა გაგრძელდეს“- აღნიშნა აბაშიძემ.