"მე ვარ ნაციონალური მოძრაობის კანდიდატი, მაგრამ მათ დაშვებულ შეცდომებზე ღიად ვსაუბრობ "- ზაალ უდუმაშვილი

პოლიტიკა - 14:37, 07 Jul, 2017

15383

"ერთიანი ნაციონალური მოძრაობის" მერობის კანდიდატი ზაალ უდუმაშვილი აცხადებს, რომ თბილისელების პრობლემებს 24 საათის განმავლობაში მოისმენს და მათ მოგვარებაზე მოსახლეობასთან ერთად იზრუნებს.

"24 საათის განმავლობაში, თბილისის ქუჩებში ვიქნები გასული, შევხვდები ყველა რაიონსა და უბანში მცხოვრებ ადამიანებს. დავივლი კორპუსებს, სახლებს გავეცნობი მათ პრობლემებს, რათა მათი გადაჭრა უკეთ შევძლო. ჩემი მთავარი ხაზი თბილისელების მოსმენა და მათთან ერთად ამ პრობლემების გადაჭრა იქნება"- განაცხადა ტვ.პირველის ეთერში მერობის კანდიდატმა.

ზაალ უდუმაშვილმა ღია ეთერში განაცხადა, რომ "სითი პარკთან" დადებული ხელშეკრულება წინა ხელისუფლების შეცდომა იყო.

ჟურნალისტი დაინტერესდა, ხომ არ არის ეს თემა ენმ-ს ერთგვარი ტაქტიკა, რადგან კომპანიასთან შეთანხმება გიგი უგულავას მერობის დროს მოხდა, რომელმაც "ნაციონალური მოძრაობა" რამდენიმე წევრთან ერთად დატოვა. უდუმაშვილმა უგულავას იმ განცხადებას უპასუხა, რომლის მიხედვითაც ენმ-ს მერობის კანდიდატს "სითი პარკთან" დადებული ხელშეკრულება წაკითხულიც კი არ აქვს.

უდუმაშვილის თქმით, მას წინა ხელისუფლების შეცდომებზე საუბრის კომპლექსი არ აქვს.

"მე იმაზე მეტი რამ მაქვს წაკითხული, ვიდრე ეს მათ ჰგონიათ. პერსონებზე არ ვსაუბრობ, ვაცხადებ, რომ ეს შეცდომა წინა ხელისუფლების დროს იყო დაშვებული და ამაზე ძალიან ღიად ვსაუბრობ. მე არცერთი ხელისუფლების მიერ დაშვებულ შეცდომაზე პასუხისმგებელი არ ვარ. დიახ, მე ამ ბრძოლაში ნაციონალური მოძრაობის კანდიდატი ვარ, მაგრამ ასევე ღიად შემიძლია ვისაუბრო იმ შეცდომებზე რაც დაშვებული იყო მათი ხელისუფლების პირობებში"- განაცხადა უდუმაშვილმა.