რუსეთი 1 მეტრით გადმოწევს საზღვარს, თუ 100 მეტრით, ქვეყნის 1/3 ოკუპირებული მაინც აქვს

რუსეთი 1 მეტრით გადმოწევს საზღვარს, თუ 100 მეტრით, ქვეყნის 1/3 ოკუპირებული მაინც აქვს - ფოფხაძე

პოლიტიკა - 20:54, 06 Jul, 2017

24613

ტერიტორიული მთლიანობის აღდგენის დროებით საპარლამენტო კომისიის თავმჯდომარე გედევან ფოფხაძე ჟურნალისტებთან საუბარში აცხადებს, რომ საქართველოს პრეტენზია რუსეთის მიმართ არ უნდა იყოს დაკავშირებული საოკუპაციო ხაზის გადმოწევის კონკრეტულ შემთხვევებთან, არამედ მთლიანად ოკუპაციასთან.

"ჩვენი ქვეყნის ტერიტორიის დიდი ნაწილი ოკუპირებულია და რუსები 1 მეტრით გადმოიწევიან თუ 100-მეტრით, ქვეყნის თითქმის 1/3 აქვთ ოკუპირებული", - აცხადებს ქართული ოცნების წევრი.

"სამწუხაროდ, უხეშ ძალასთან სხვა ფორმით ურთიერთობა შეუძლებელია. ჩვენ ვხედავთ, რომ ეს პროცესი მარტო საქართველოში არ მიდის - მიდის უკრაინაში და რუსეთის დამოკიდებულება არც საერთაშორისო სამართლის ჩარჩოებში ექცევა და არც რაიმე დიპლომატიის სტანდარტებს ექვემდებარება. აქედან გამომდინარე, ჩვენი ერთადერთი გამოსავლი არის საერთაშორისო საზოგადოების ჩარევა.

ფოფხაძის აზრით, საქართველოს პრეტენზია რუსეთის მისამართით დაკავშირებული უნდა იყოს მთლიანად ოკუპაციასთან და არა საზღვრის გადმოწევასთან. იგი მიიჩნევს, რომ რუსეთის დღის წესრიგშია ვისაუბროთ მცოცავ ანექსიაზე და მის კონკრეტულ ქმედებაზე და არა მთლიან ოკუპაციაზე. დეპუტატის ინფორმაციით, პარლამენტი საშემოდგომო სესიაზე მიიღებს რეზოლუციის პროექტს, რომელიც რუსეთის ანექსიის თაობაზე კომისიის ფარგლებში მომზადდა.

"რუსეთისთვის ეს არის ერთგვარი მეთოდი არა მხოლოდ ჩვენი ტერიტორიული მთლიანობის შელახვისა, არამედ თავისი მხრიდან დღის წესრიგის განსაზღვრის მცდელობა - სულ ვიყოთ დამოკიდებული რუსეთის დღის წესრიგზე, ვისაუბროთ მცოცავ ანექსიაზე და მის კონკრეტულ ქმედებაზე. საჯარო რეალობა, რაზეც რეალურად უნდა იყოს საუბარი არის ის, რომ ჩვენი ქვეყნის ტერიტორიის დიდი ნაწილი ოკუპირებულია და ერთი მეტრით გადმოიწევიან თუ 100-მეტრით, ქვეყნის თითქმის 1/3 აქვთ ოკუპირებული. ასე რომ, ჩვენი პრეტენზია რუსეთთან ნამდვილად ვერ შემოიფარგლება კონკრეტული ნაბიჯებით მისი მხრიდან", - ამბობს ფოფხაძე.