"მზად ვართ გავაგრძელოთ დიალოგი" - პრემიერი საკონსტიტუციო რეფორმის ირგვლივ კონსენსუსზე საუბრობს

პოლიტიკა - 11:15, 06 Jul, 2017

1663

საქართველოს პრემიერ-მინისტრი საკონსტიტუციო რეფორმასთან დაკავშირებით დიალოგისთვის მზადყოფნას გამოთქვამს. გიორგი კვირიკაშვილი ვენეციის კომისიის პრეზიდენტთან გამართულ სატელეფონო საუბარსაც გამოეხმაურა და აღნიშნა, რომ დიალოგის გაგრძელებასთან დაკავშირებით საქართველოს ხელისუფლების მზადყოფნას ვენეციის კომისიის ხელმძღვანელი პოზიტიურად შეხვდა:

„მოგეხსენებათ, ეს პროცესი საკმაოდ მაღალი ჩართულობით მიმდინარეობდა. წინა საკონსტიტუციო ცვლილებების პროცესისგან განსხვავებით, იყო ძალიან მნიშვნელოვანი საჯარო განხილვები, სადაც ყველა იყო ჩართული და ჩვენ გამოვთქვამთ მზადყოფნას, კიდევ გავაგრძელოთ დიალოგი, რათა მივიღოთ კონსტიტუცია, რომელიც ნამდვილად იქნება ჩვენი ქვეყნის უმრავლესობის ნების გამოხატულება. ეს არის მნიშვნელოვანი. შეგვიძლია ვიმსჯელოთ იმაზე, რამდენად არის მზადყოფნა პოლიტიკურ სპექტრში კონსენსუსის მიმართულებით. ჩვენ ჩვენი მხრიდან გადავდგით ძალიან დიდი ნაბიჯები, რომლებზეც დეტალურად აღარ ვისაუბრებ და მზად ვართ, კიდევ მოვნახოთ ზომები, სადაც შესაძლებელი იქნება რაღაცებზე დამატებით შეთანხმება.“ - განაცხადა გიორგი კვირიკაშვილმა.