ჩხოროწყუს სამაშველო ოპერაციაში ჩართულ ეკიპაჟს პრეზიდენტს სახელმწიფო ჯილდოზე წარუდგენენ

პოლიტიკა - 11:06, 06 Jul, 2017

23700

პრემიერი ჩხოროწყუს ოპერაციაში ჩართული ეკიპაჟის წევრებს პრეზიდენტს სახელმწიფო ჯილდოზე წარუდგენს. ამის შესახებ განცხადება გიორგი კვირიკაშვილმა მთავრობის სხდომაზე გააკეთა. მისი თქმით ეკიპაჟის მეთაურმა ბესიკ გაბიანმა და ეკიპაჟის წევრებმა - ბესიკ ბაკურიძემ, შალვა შალიბაშვილმა და დიმიტრი ქააძემ გმირული საქციელი ჩაიდინეს და ჩხოროწყუში, ვერტმფრენი პრაქტიკულად ადიდებულ მდინარეზე დასვეს, რის გამოც ისინი ჯილდოს იმსახურებენ.

„სამეგრელოში შინაგან საქმეთა სამინისტროს საგანგებო სიტუაციების მართვის სააგენტოსა და სასაზღვრო პოლიციის ერთობლივ ოპერაციაში ჩართული ეკიპაჟის წევრები, რომლებმაც ორი ადამიანის სიცოცხლე გადაარჩინეს, მინდა, პრეზიდენტს სახელმწიფო ჯილდოზე წარვუდგინოთ.

ასევე გუშინ, შავი ზღვის აკვატორიაში 5 ბალამდე შტორმის დროს, მაშველებმა საკუთარი სიცოცხლის რისკის ფასად 20 ადამიანი გადაარჩინეს, აქედან ორი იყო უცხო ქვეყნის მოქალაქე. ყველა დამეთანხმებით, რომ ეს თავდადება ძალიან დასაფასებელია და მინდა მივმართო შინაგან საქმეთა სამინისტროს, უზრუნველყოს მათი სათანადოდ დაჯილდოება და წახალისება.

ეს არის უაღრესად საპატიო საქმე და ძალიან საამაყოა, რომ გვყავს ასეთი მაღალპროფესიონალი მაშველები და მფრინავები, რომლებმაც გუშინ სასწაული შეძლეს.

ასევე დიდი მადლობა მინდა გადავუხადო ყველა მეხანძრე-მაშველს, რომლებიც რამდენიმე დღის წინ თბილისში მომხდარი ხანძრის ლიკვიდაციაში მონაწილეობდნენ."- განაცხადა გიორგი კვირიკაშვილმა.