ეროვნული გამოცდები მიმდინარეობს, თუმცა აბიტურიენტებს გამოცდების ჩაბარება საკმაოდ რთულ პირობებში უწევთ. საუბარია იმაზე, რომ ოთახები სადაც გამოცდები ტარდება არ არის უზრუნველყოფილი შესაბამისი ინფრასტრუქტურით, კერძოდ კონდიცირების სისტემით. აღნიშნული განხილვის საგანი გახდა უკანასკნელი დღეების მანძილზე, რაზეც კომენტარს აკეთებს ვიცე-პრემიერი, საქართველოს განათლებისა და მეცნიერების მინისტრი ალექსანდრე ჯეჯელავა:

„სიცხე ნამდვილად პრობლემაა. გამოცდები სტრესია და სადაც არის კონდიციონერი, სამწუხაროდ, გულის წასვლის შემთხვევები იქაც ფიქსირდება. სამწუხაროდ, გამოცდების დაწყების პერიოდს დაემთხვა ტემპერატურის მნიშვნელოვანი ზრდა. ბოლო წლებში დავიწყეთ საგამოცდო ცენტრების თავმოყრა. იმედი გვაქვს, რომ ყველა ცენტრში გვექნება კონდიციონერი. რაც შეეხება იმ შემთხვევებს, როცა კონდიციონერს არ რთავენ, ზოგჯერ ადგილი აქვს ტექნიკურ პრობლემას. სამწუხაროდ, ზოგჯერ ისეთი ვითარება გვაქვს, რომ ის პირიქით ხელს უშლის რომელიმე აბიტურიენტს. ეს ის თემაა, რის გამოსწორებაზეც უნდა ვიმუშაოთ. რაც შეეხება ერთიან ეროვნულ გამოცდებს. ის გეგმიურად მიდის, სერიოზული ხარვეზები არ ფიქსირდება“, - განაცხადა ჯეჯელავამ.