საქართველოს პრეზიდენტმა გუშინ ქვეყანაში არსებულ სხვადასხვა პრობლემებზე ისაუბრა. გადაცემა „არჩევანში“ საუბრისას გიორგი მარგველაშვილი საკონსტიტუციო ცვლილებებს შეეხო. აღნიშნულს ეხმაურება საქართველოს პარლამენტის თავმჯდომარე ირაკლი კობახიძე, რომელმაც განაცხადა, რომ პრეზიდენტის მოსმენით მან ერთი საათი დაკარგა:

„გუშინ დაახლოებით, ერთი საათი დავკარგე მე პრეზიდენტის საუბრის მოსმენაზე. კიდევ ერთხელ მინდა მოვუწოდო პრეზიდენტს, რომ ღია ეთერში დავსხდეთ ერთად და საზოგადოებას ვესაუბროთ ერთად საკონსტიტუციო ცვლილებების თაობაზე. ასეთ შემთხვევაში საზოგადოებას შეექმნება ნათელი წარმოდგენა საკონსტიტუციო რეფორმის შინაარსის შესახებ. ასეთი ცალმხრივი საუბრებით, ბუნებრივია, საზოგადოება ვერ იღებს ინფორმაციას. ჩვენ პრეზიდენტს ძალიან კარგ ფორმატს ვთავაზობთ. ეს ფორმატი გულისხმობს იმას, რომ ჩვენ ერთად დავსხდეთ ღია ეთერში საზოგადოების წინაშე და ერთად ვესაუბროთ საკონსტიტუციო რეფორმის შინაარსის თაობაზე. ჩვენი შეთავაზება ძალაშია და იმედს ვიტოვებთ, რომ ეს ფორმატი შედგება“, - განაცხადა კობახიძემ.