ინდოელი ბიზნესმენი საქართველოში შემოსვლას დღესაც შეეცდება- ადვოკატი შსს-სგან პასუხს ელოდება

პოლიტიკა - 12:58, 05 Jul, 2017

1140

ინდოელი ბიზნესმენი აკბარ ქუშერი, რომელსაც საქართველოს საზღვარზე შემოსვლისას პრობლემები შეექმნა, საქართველოში შემოსვლას დღეს შეეცდება. მისი ადვოკატი შინაგან საქმეთა სამინისტროში შეტანილ განცხადებაზე უწყებისგან პასუხს ელოდება. ადვოკატმა მანანა აფხაძემ შს სამინისტროს წერილით გუშინ მიმართა და თბილისის საერთაშორისო აეროპორტის სათვალთვალო კამერებიდან ჩანაწერების ამოღება და იმ პირთა დადგენა მოითხოვა, ვინც ინდოელი ბიზნესმენის გაძევებისას მესაზღვრე პოლიციელებს სატელეფონო მითითებებს აძლევდა.

„რამდენიმე წუთის წინ დაეწერა ქალბატონ ირინა ჯიშკარიანს. მე ვესაუბრე ქალბატონ ირინა ჯიშკარიანს, მან მითხრა, რომ მისთვის ცნობილია რამდენად აქტუალურია ეს საკითხი, როგორ ხდება მისი გაშუქება და დაინტერესებაც ძალიან დიდია და აღმითქვა, რომ 15-20 წუთში მომცემდა პასუხს თუ რა ღონისძიებები უნდა გაატაროს მან, რომ დაბეჯითებით მითხრას თუ რაიმე საფრთხე აქვს ადამიანს, რომელიც დღეს აპირებს ქვეყანაში შემოსვლას. ამ ადამიანმა ყველა მტკიცებულება წარმოადგინა იმისათვის, რომ ის უკანონოდ არ ჰკვეთდა საზღვარს,“-განაცხადა მანანა აფხაძემ.

ადვოკატის თქმით, ამ შემთხვევამდე აკბარ ქუშერს პოლიციასთან პრობლემა არ ქონია და გაუგებარია რა მიზეზით გააძევეს ის საქართველოდან. ბიზნესმენი ქართველ სამართალდამცველებს დამამცირებელ მოპყრობაშიც ადანაშაულებს.

„საქართველოში ზუსტად 17-ჯერ ვარ ნამყოფი და ნამდვილად არ ვიცი რატომ შემექმნა ქვეყანაში შემოსვლის პრობლემა. მაქვს დაუზუსტებელი ინფორმაცია, რომ თითქოს საქართველოში შემოსვლა იმიტომ ამეკრძალა, რომ რაღაც დოკუმენტზე ხელმოწერაზე უარი ვთქვი. მე არ ვიცი რაზეა საუბარი, საპასპორტო კონტროლის ტერიტორია პირველი მოთხოვნისთანავე დავტოვე, რადგან არ მინდოდა კიდევ უფრო მეტი დამცირება გადამეტანა. კარგი იქნებოდა თუ რომელიმე პასუხისმგებელი პირი აეროპორტის ვიდეოჩანაწერებს ნახავდა და დაადგენდა მქქონდა თუ არა ყველა საჭირო საბუთი იმისთვის, რომ ქვეყანაში შემოვსულიყავი. ვიმედოვნებ სამართალდამცავები დროულად გაარკვევენ რომ საქართველოში ჩემი საქმიანობა კანონიერია და ამ ქვეყნისთვის სარგებლობის მოტანა შემიძლია.“- განაცხადა აკბარ ქუშერმა.