თარგამაძე არ გამოვრიცხავს, რომ მისი აფეთქების საქმეში ბრალდებული ხეჩუაშვილი ლიკვიდირებულია

პოლიტიკა - 16:05, 03 Jul, 2017

2452

„ევროპული საქართველოს“ ერთ-ერთი ლიდერი გივი თარგამაძე არ გამორიცხავს, რომ მის აფეთქებაში მონაწილე დავით ხეჩუაშვილი შესაძლოა ლიკვიდირებული იყოს, რადგან ამ პირთან დაკავშირებით ინფორმაციის მოძიების ყველა მცდელობა უშედეგო აღმოჩნდა. თარგამაძე გამოძიებას უნდობლობას უცხადებს და აპირებს გამოძიება თავად აწარმოოს:

,,ვაპირებ გავაგრძელო საკუთარი გამოძიება. საკმაოდ შორს ვარ წასული. პრაქტიკულად ჩემთვის ცნობილია უშუალოდ ტერაქტის განმახორციელებელი ყველა პირი, ასევე ცნობილია დაკავშირებული პირები. ისინი გამოკვეთილია გამოძიებაშიც, მაგრამ მათ მიმართ არ ტარდება არც ოპერატიული და არც პროცესუალური მოქმედებები. ჩემთვის ასევე ცნობილია დაკვეთის მიმართულება, ეს არის როგორც რუსული, ასევე ქართული სპეცსამსახურები და პოლიტიკური ხელმძღვანელობა. ასევე ამ ქვეყნის არაფორმალური მმართველი ბიძინა ივანიშვილი. დასაზუსტებელი დამრჩა ის დამკვეთები, რომლებმაც ჩემი პერსონიფიცირება მოახდინეს, როგორც ტერორისტული აქტის ობიექტის და მოსაძიებელი მაქვს დამატებით მტკიცებულებები, რომლებიც ჩემი გამოძიების შედეგებს გაამაგრებს. ამას მე გავაკეთებ და მაშინ როდესაც სასამართლო იქნება იმ კონდიციაში, რომ ასეთი საქმეები განიხილოს, განიხილავს კიდეც, ხეჩუაშვილი აბრამიშვილისგან განსხვავებით, რომელიც მოსკოვში ჩანს ჩემზე განხორციელებული ტერაქტის საქმესთან დაკავშირებულ ადამიანებთან ერთად, ხეჩუაშვილი აფეთქების შემდეგ საერთოდ არსად არ გამოჩენილა. ჩემი მცდელობები, მისი გადაადგილების შესახებ რაიმე ინფორმაციის მოძიებაზე უშედეგოა. აქედან გამომდინარე, მე არც იმას გამოვრიცხავ, რომ ხეჩუაშვილი საერთოდ ლიკვიდირებული იყოს. თუ ადვოკატი კონკრეტულად იძახის, რომ ხეჩუაშვილი მოსკოვში მუშაობს, კარგი იქნება თუ ამის ცნობასაც წარმოადგენს." - განაცხადა გივი თარგამაძემ.