უმრავლესობის წევრები არ პასუხობენ კითხვას, რატომ არ იმყოფებოდა ფუნიკულიორზე "ქართული ოცნების" დამფუძნებელი, თუმცა აცხადებენ, რომ ბიძინა ივანიშვილი “ქართულ ოცნებას” მხარს უჭერს.

ამ საკითხებზე "ნიუპოსტი" მმართველი პოლიტიკური პარტიის ერთ-ერთ წევრს ზაზა პაპუაშვილს ესაუბრა. მისი თქმით, ბიძინა ივანიშვილის გადასაწყვეტია, რა ღონისძიებაში მიიღოს მონაწილეობა.

- რატომ არ იმყოფებოდა ყოფილი პრემიერი კახა კალაძის წარდგენაზე?

- არ ვიცი რატომ არ მივიდა, რატომ უნდა მისულიყო არც ის ვიცი. არ არის ჩემთვის ასეთი მნიშვნელოვანი ბიძინა ივანიშვილი მივიდოდა იქ თუ არ მივიდოდა... დღის წესრიგში რატომ დგას ეს კითხვა?!

- იმიტომ დადგა, რომ ყველა მნიშვნელოვანი არჩევნების დროს ივანიშვილი საზოგადოებას "ქართული ოცნების" მხარდაჭერის დროს საზოგადოებას მხარდაჭერისკენ მოუწოდებდა...

- "ქართული ოცნების" გვერდით ის (ბიძინა ივანიშვილი) დღესაც დგას. ასე გადაწყვიტა, ალბათ ექნება არგუმენტები რატომ არ იყო ღონისძიებაზე.

- შეთანხმებული იყო თუ არა ივანიშვილთან, კალაძის კანდიდატურა?

- მე არ მაქვს ინფორმაცია შეთანხმებული იყო თუ არა, საუბარს რჩევების დონეზე არ გამოვრიცხავ. კალაძესთან დაკავშირებით, საერთო შეთანხმება არსებობს.

- რა ინფორმაცია გაქვთ, ბიძინა ივანიშვილის ჯანმრთელობის მდგომარეობის შესახებ? როდის გქონდათ მასთან კომუნიკაცია?

- შეხვედრით არ შევხვედრივარ, 2 თვის წინ სატელეფონო საუბარი მქონდა. რაც შეეხება ჯანმრთელობის მდგომარეობას, ეს ინფორმაციები ვიღაცების აკვიატება თუ სურვილია არ ვიცი. მე მაქვს ინფორმაცია, რომ ჯანმრთელად და კარგად არის.