ჩიხში შესული კონსტიტუცია - ვენეციის კომისია კრიზისზე საუბრობს, ოპოზიცია პროექტის უკან გამოწვევას ითხოვს

პოლიტიკა - 17:43, 29 Jun, 2017

1787

ვენეციის კომისიის თავმჯდომარემ ოპოზიციის წარმომადგენლებთან შეხვედრა გამართა, ოპოზიციური პარტიების წევრების თქმით შეხვედრაზე მსჯელობა საკონსტიტუციო პროექტში არსებულ პრობლემებზე იყო და ამასთანავე გაჟღერდა კონსტიტუციის პროექტის პარლამენტიდან უკან გამოწვევის საკითხიც. ოპოზიციური პარტიების წარმომადგენლების განცხადებით, ვენეციის კომისიის თავმჯდომარემ, ჯანი ბუკიკიომ ეს იდეა მოიწონა. ოპოზიციური სპექტრის შეფასებით, თუ საქართველოს ხელისუფლებამ ვენეციის კომისიის აზრი არ გაითვალისწინა, მაშინ ამ ხელისუფლების საერთაშორისო ლეგიტიმაციის საკითხი კითხვის ნიშნის ქვეშ დადგება.

თავად ჯანი ბუკიკიოს განცხადებით დემოკრატიული კონსტიტუციის მიღებისთვის საჭიროა, რომ ყველა მხარემ გამოიჩინოს პასუხისმგებლობა და პოლიტიკურ ძალებს შორის დიალოგი შედგეს. მისი თქმით კონსიტუციის პროექტი, რომელიც ვენეციის კომისიამ მოიწონა მნიშვნელოვნად განსხვავდება იმ ვარიატისგან, რომელიც პარლამენტმა მიიღო.

„ეს კარგი კონსტრუქციული შეხვედრა იყო. ყველა ოპოზიციური პარტია მხარს უჭერს საქართველოსთვის უფრო დემოკრატიულ კონსტიტუციას. მათ ესმით შექმნილი კრიზისი და დარწმუნებული ვარ რომ ყველა შესაძლებელს გააკეთებენ მის გადასალახად. როგორც უკვე აღვნიშნე საჭიროა საუბარი , დიალოგი ყველა პოლიტიკურ ძალას შორის, როგორც ოპოზიციის ასევე უმრავლესობის მხრიდან. ქართველი პოლიტიკოსები უნდა ესაუბრონ ერთმანეთს. მე ხვალ დავტოვებ საქართველოს და თქვენ ქართველებმა, სამოქალაქო საზოგადოებამ, ოპოზიციამ, უმრავლესობამ უნდა მოძებნოთ საუკეთესო გადაწყვეტილება, რათა მიიღოთ კარგი ახალი კონსტიტუცია. ადრეც ვთქვი, რომ კონსტიტუციის პროექტი, რომელიც ვენეციის კომისიამ შეისწავლა, მთლიანობაში კარგია. ანუ, უკვე არის დადებითი ნაბიჯი, მაგრამ ბოლო ცვლილებების შემდეგ უკვე ვერ ვიტყვი, რომ ასეა. მოვუწოდებ ყველა მხარეს, პასუხისმგებლობა გამოიჩინონ და ყველაფერი შესაძლებელი გააკეთონ, რათა საქართველოში დემოკრატია გააუმჯობესონ.“- განაცხადა ჯანი ბუკიკიომ.

ვენეციის კომისიის ხელმძღვანელი ხვალ არასამთავრობო სექტორს შეხვდება.