"ხელისუფლება ყველანაირად ცდილობს მუხთარლის თემა გააქროს დღის წესრიგიდან"- გოცირიძე საგამოძიებო კომისიის შექმნას ითხოვს

პოლიტიკა - 13:01, 29 Jun, 2017

1190

აზერბაიჯანელი ჟურნალისტის აფგან მუხთარლის საქმეზე საგამოძიებო კომისიის შექმნის აუცილებლობას უსვამს ხაზს „ნაციონალური მოძრაობის“ წევრი რომან გოცირიძე. დეპუტატის თქმით ხელისუფლება აღნიშნული თემის დღის წესრიგიდან გაქრობას ცდილობს და სწორედ ხელისუფლების ხელი ურევია იმაშიც, რომ საქმის გამოძიება ჭიანურდება:

„ხელისუფლება ყველანაირად ცდილობს, რომ მუხთარლის თემა როგორმე გააქროს დღის წესრიგიდან, ამიტომ დროებითი საგამოძიებო კომისიის შექმნა, იმიტომაც არის თუნდაც აუცილებელი, რომ ხელისუფლებამ იგრძნოს პასუხისმგებლობა და აღიაროს თავისი დანაშაული. ვინაიდან ნათელია, რომ ხელისუფლების მაღალი ეშელონების დანაშაულებრივი ქმედებების გარეშე ვერ მოხდებოდა ამ საქმის გამოძიების გაჭიანურება“- განაცხადა რომან გოცირიძემ.

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, როგორც მისი ადვოკატის მიერ გავრცელებული ინფორმაციით ირკვევა, თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდნენ.