"კომისიის შექმნა არასწორია, გამოძიებას ხელს შეუშლის და პოლიტიკური გავლენა ექნება"- ვოლსკი მუხთარლის საქმეზე

პოლიტიკა - 12:57, 29 Jun, 2017

1237

მმართველი გუნდის წარმომადგენლის გია ვოლსკის შეფასებით, აზერბაიჯანელი ჟურნალისტის აფგან მუხთარლის საქმეზე პარლამენტში საგამოძიებო კომისიის შექმნა ერთის მხრივ გამომძიებელთა მუშაობას შეუშლის ხელს, მეორეს მხრივ კი საქმეს პოლიტიკურ ელფერს მისცემს:

„კომისიის შექმნა პოლიტიკური გუნდების გაერთიანებით ხელს შეუშლის გამომძიებელთა მუშაობას და ძალიან პოლიტიკური გავლენა ექნება პროცესს და არასწორია. არასწორია ის ადამაიანი, რომელიც ამბობს რომ ეს არის პრომიტიული თემა, მოიტაცეს, წაიყვანეს, გადასცეს. ასე არ არის ეს ძალიან მრავალასპექტიანი საკითხია და გამოძიებაც ინტენსიურად მიმდინაროებს და ძალიან ბევრი საგამოძიებო მოქმედებებია ჩატარებული.“- განაცხადა გია ვოლსკიმ.

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, როგორც მისი ადვოკატის მიერ გავრცელებული ინფორმაციით ირკვევა, თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდნენ.