"ციანიდის საქმე"- ადვოკატების თქმით მოწმეთა დაკითხვები შესაძლოა რამდენიმე თვე გაგრძელდეს

პოლიტიკა - 11:53, 29 Jun, 2017

1480

„ციანიდის საქმეზე“ დაკავებული სასულიერო პირის უფლებადამცველების განცხადებით, სასამართლოზე ამ დრომდე დაკითხული მოწმეების ჩვენებით, ე.წ ციანიდის საქმეში მამა გიორგი მამალაძის ბრალეულობა არ იკვეთება.

„არათუ შეუსაბამობა საგამოძიებო მოქმედებების დროს მიცემულ ჩვენებებში, არამედ სასამართლოშიც კი გარკვეული შეუსაბამობა იყო იმ პირების მიერ მიცემულ ჩვენებებს შორის, რომლებიც ერთ სამსახურს წარმოადგენენ. აქედან გამომდინარე , მე შემიძლია გითხრათ, რომ როგორც ირაკლი მამალაძე, ასევე ყველას ჩვენება შეუსაბამოა.“- განაცხადა მიხეილ რამიშვილმა.

საგამოძიებო მოქმედებების დროს არსებულ დარღვევებზე აკეთებს აქცენტს ადვოკატი გიორგი ფანცულაიაც, მისი თქმით დღეს სწორედ ის გამომძიებლები იკითხებიან, რომლებმაც აეროპორტში ბარგის ამოღება და დალუქვა მოახდინეს. როგორც ფანცულაია აღნიშნავს, რომ ირაკლი მამალაძე კარგად დაწერილი სპექტაკლის სცენარის მიხედვით საუბრობს, ხოლო რაც შეეხება აეროპორტის თანამშრომლების ჩვენებებს ჩხრეკასთან დაკავშირებით, დეკანოზის უფლებადამცველის შეფასებით, მათი ჩვენებები მეტწილად დაცვის მხარის პოზიციას ამყარებს.

"დღევანდელ პროცესზე ჩვენ არაერთი მწვავე კითხვა გვექნება. როგორ მოხდა ჩანთის დალუქვა და ციანიდის მოთავსება. ყოველი მოწმე ადასტურებს, რომ უკანონო ქმედებები განხორციელდა. რატომ მოხდა ის დიდი უკანონობა, რაც მოხდა?“- განაცხადა გიორგი ფანცულაიამ. ადვოკატმა საქმეში არსებულ იარაღთან დაკავშირებითაც გააკეთა კომენტარი და კიდევ ერთხელ განაცხადა, რომ იარაღი, რომელზეც გამოძიება საუბრობს, რეალურად ირაკლი მამალაძეს ეკუთვნოდა:

„დეკანოზს არაერთხელ უთქვამს, რომ ირაკლი მამალაძემ თხოვა იარაღის შენახვა და სხდომაზე დეკანოზმა ეს კითხვა მას დაუსვა. მოწმეებიც დაადასტურებენ, რომ ეს მამალაძის იარაღია, ადამიანის, რომელმაც ამ სპექტაკლში მთავარი როლი შეასრულა. არიან ასეთი მოწმეები, თუმცა წინასწარ მათზე არ ვისაუბრებ, რათა ზეწოლა არ მოხდეს.“- განაცხადა ადვოკატმა.

დეკანოზის უფლებადამცველი აცხადებს, რომ მოწმეთა დაკითხვები კიდევ რამდენიმე თვის განმავლობაში შეიძლება გაგრძელდეს, რადგან პროკურატურას დასაკითხი 100-ზე მეტი მოწმე ჰყავს, ამ ეტაპზე კი მათგან მხოლოდ ათია დაკითხული.