"ივანიშვილის გუნდმა ყველა აბუჩად აიგდო, რასაც ვენეციის კომისიის ადექვატური რეაქცია მოჰყვა"- კაპანაძე

პოლიტიკა - 11:16, 29 Jun, 2017

1690

"ევროპული საქართველოს" ერთ-ერთი ლიდერი სერგი კაპანაძე ქვეყნის მთავარი დოკუმენტის ირგვლივ მმართველი პოლიტიკური პარტიის გადაწყვეტილებას სამარცხვინოს უწოდებს.

როგორც კაპანაძემ "ნიუპოსტს" განუცხადა, "ქართულმა ოცნებამ" ვენეციის კომისიას სხვა დოკუმენტი გაუგზავნა, საბოლოოდ კი სულ სხვა ვარიანტი მიიღო.

"ვენეციის კომისიის კრიტიკას ველოდით, რადგან როგორ შეიძლება რეაქცია არ ყოფილიყო, რადგან ქართულმა ოცნებამ მათ ერთი დოკუმენტი გადაუგზავნა და მეორე ვარიანტი მიიღო. ყველას არწმუნებდა, რომ პროპორციულ მოდელზე გადადიოდა და ეს პროცესი 2024 წლამდე გადაწია. ივანიშვილის გუნდმა, აბუჩად აიგდო ყველა. ყველაფერს თავი რომ დავანებოთ, ვენეციის კომისიამ კონსენსუსის აუცილებლობას ხაზი არაერთხელ გაუსვა, რადგან ჩათვალა რომ ეს არ უნდა იყოს ცალმხრივი დოკუმენტი და უფრო ფართოდ შემუშავებული ყოფილიყო, თუმცა ქართულ ოცნებას ამ რეკომენდაციისთვის აბსოლუტურად არანაირი რეაქცია არ მიუცია და ერთპიროვნულად, ტაშისკვრით მიიღეს დოკუმენტი, რითაც სამარცხვინო ნაბიჯი გადადგეს, რასაც ბუკიკიოს მხრიდან ადექვატური რეაქცია მოჰყვა"- განუცხადა "ნიუპოსტს" სერგი კაპანაძემ.

მისი თქმით, "პასუხისმგებლიანი ხელისუფლება ვენეციის კომისიის კრიტიკას გაითვალისწინებდა და ამ შენიშვნებს დოკუმენტში ასახავდა", თუმცა "ქართული ოცნების" შემთხვევაში დეპუტატს ამის მოლოდინი არ აქვს.

"როგორც ჩანს ქართულ ოცნებაში მიიღეს პოლიტიკური გადაწყვეტილება, უნდათ ერთპარტიული კონსტიტუცია, რომელიც მხოლოდ ერთი ადამიანის ინტერესებს აკმაყოფილებს. მათ ეგონათ რომ მოტყუებით გავიდოდნენ ფონს"- დასძინა კაპანაძემ.