საქართველოს განათლებისა და მეცნიერების მინისტრმა ალექსანდრე ჯეჯელავამ 2016 წელს განაცხადა, რომ 2017 წლის სექტემბრიდან, ანუ 2017-18 წლებიდან პირველიდან მეექვსე კლასის ჩათვლით, მოსწავლეები ახალი სახელმძღვანელოებით ისწავლიდნენ, თუმცა 2017 წლის თებერვალში ცნობილი გახდა, რომ საგანი “მე და საზოგადოება” და ასევე ახალი გრიფირებული სახელმძღვანელოები, 2017–2018 სასწავლო წელს სკოლაში აღარ გამოჩნდება.

მინისტრმა თებერვალში განაცხადა, რომ განათლების სამინისტრო სახელმძღვანელოების გრიფირებას უახლოეს მომავალში გამოაცხადებდა, შეირჩევა სახელმძღვანელოები, თუმცა მასობრივად არ დაიბეჭდება. ამასთან, გრიფირების წესში შევიდა ცვლილება, რომლის თანახმადაც მოწონებული სახელმძღვანელო დამატებით ერთწლიან დაკვირვებას გაივლის.

რაც შეეხება საგანს “მე და საზოგადოება”, ჯეჯელავას განმარტებით, 2017-18 წლებში იქნება მხოლოდ სამუშაო ვერსია და არა სახელმძღვანელო მოსწავლეებისთვის. სამინისტრო მიიღებს შენიშვნებს, გაითვალისწინებს რეკომენდაციებს და ამის შემდეგ, მომდევნო, 2018–2019 სასწავლო წელს საგანი სკოლაში შევა ისევე, როგორც ახალი გრიფირებული წიგნები.