"ხელისუფლება მომავალ არჩევნებზე მუნიციპალიტეტებზე კონტროლის გაიოლებას ცდილობს"

"ხელისუფლება მომავალ არჩევნებზე მუნიციპალიტეტებზე კონტროლის გაიოლებას ცდილობს" - სევდია უგრეხელიძე

პოლიტიკა - 11:59, 28 Jun, 2017

994

ერთიანი ნაციონალური მოძრაობის დეპუტატმა თბილისის საკრებულოში, სევდია უგრეხელიძემ დღეს გამართულ ბრიფინგზე თვითმმართველი ქალაქებისთვის სტატუსის შეჩერებაზე ისაუბრა და აღნიშნა, რომ საარჩევნო კოდექსში ნაჩქარევად ინიცირებული ცვლილებები მიუთითებს იმაზე, რომ ხელისუფლება მომავალ არჩევნებზე მუნიციპალიტეტებზე კონტროლის გაიოლებას ცდილობს.

„მიმდინარე წლის 15 ივნისს, ადგილობრივი თვითმმართველობის არჩევნებამდე 4 თვით ადრე, საქართველოს პარლამენტმა 14 მუნიციპალიტეტი გააუქმა და ისინი 7 ახალ ერთეულად გააერთიანა. თვითმმართველი ქალაქების სტატუსი დაკარგა ზუგდიდმა, ოზურგეთმა, გორმა, ამბროლაურმა, თელავმა, ახალციხემ და მცხეთამ, მათ შეუერთდა ამავე დასახელების სათემო მუნიციპალიტეტები. ეს ადგილობრივი დემოკრატიის განვითარების გზაზე უკან გადადგმული ნაბიჯია, რადგან მათი გაყოფა 2014 წელს რეფორმის ფარგლებში განხორციელდა, რომელიც ევროსტრუქტურების მიერ დადებითად იყო შეფასებული.

დეცენტრალიზაციის პროცესის გაგრძელების ნაცვლად, ხელისუფლება ყოველგვარი დამაჯერებელი დასაბუთების გარეშე, ძალდატანებით, მოსახლეობის აზრის გაუთვალისწინებლად დგამს ნაბიჯს, რის შედეგადაც მკვეთრად გაუარესდება მუნიციპალური სერვისები, ვერ მოხდება ქალაქისა და სოფლის მოსახლეობისთვის განსხვავებული საჭიროებების გათვალისწინება, გაძნელდება მოქალაქეთა მონაწილეობის ხელმისაწვდომობა ადგილობრივ ორგანოებთან.

ყოველივე ზემოთ თქმულით ირღვევა ადგილობრივი თვითმმართველობის უფლების კონსტიტუციური პრინციპი და „ევროპული ქარტიით“ საქართველოს მიერ აღიარებული საერთაშორისო ვალდებულება. ასევე, „ადგილობრივი თვითმმართველობის კოდექსის“ მოთხოვნების საწინააღმდეგოდ, მოსახლეობასთან არ ჩატარებულა სათანადო კონსულტაციები და საჯარო განხილვა. ხმაურიანი საკრებულოს სხდომები კი აშკარა ზეწოლის ქვეშ ჩატარდა.

აღსანიშნავია, რომ მუნიციპალიტეტების გაერთიანების ინიციატივას იმთავითვე გამოეხმაურა 120-ზე მეტი არასამთავრობო ორგანიზაცია. მათ მიმართეს საქართველოს პრემიერ-მინისტრს და პარლამენტის თავმჯდომარეს, რათა არ ყოფილიყო მიღებული ეს გადაწყვეტილება, თუმცა ამაოდ.

ეს მიუთითებს იმაზე, რომ ხელისუფლებამ პოლიტიკური მოტივებით უარი თქვა თავისივე განხორციელებულ რეფორმაზე, რათა გაიადვილოს ამ მუნიციპალიტეტებზე კონტროლი მომავალ არჩევნებზე, რაზედაც მიუთითებს ხლახან ნაჩქარევად ინიცირებული ანტიდემოკრატიული ცვლილებები საარჩევნო კოდექსშიც"- განაცხადა უგრეხელიძემ.