პრორუსული ორგანიზაციები პუტინს წერილს უგზავნიან და სავიზო რეჟიმის გაუქმებას სთხოვენ

პოლიტიკა - 22:00, 27 Jun, 2017

5214

თბილისში ჩატარდა მრგვალი მაგიდა თემაზე "ქართულ-რუსული ურთიერთობების პერსპექტივები". შეხვედრაში მონაწილეობა მიიღეს ირაკლი მეორის საზოგადოების თავმჯდომარე არჩილ ჭყოიძემ,პარტია „ერთიანი საქართველოსთვის" ლიდერმა თამაზ მეჭიაურმა, მართვის სტრატეგიის ინსტიტუტის ხელმძღვანელმა პეტრე მამრაძემ, არასამთავრობო ორგანიზაცია „გორელების" წარმომადგენლებმა, ჟურნალისტებმა და საზოგადო მოღვაწეებმა.

შეხვედრის მონაწილეები რუსეთის პრეზიდენტის მისამართით წერილის გაგზავნას აპირებენ , რომელშიც ვლადიმირ პუტინს საქართველოს მოქალაქეებისათვის სავიზო რეჟიმის გაუქმების თხოვენ. ისინი მხარდამჭერების მობილიზებას აპირებენ, რათა წერილზე რომელიც კრემლში გაიგზავნება, რაც შეიძლება, ბევრი ხელმოწერა იყოს.

„წერილი მზად არის, გვინდა, რომ მას რაც შეიძლება ბევრმა ადამიანმა მოაწეროს ხელი. ვფიქრობთ, რომ მას შემდეგ კვირაში გავაგზავნით. იქ იქნება ხელმოწერები დაახლოებით 18 არასამთავრობო ორგანიზაციის წარმომადგენლის, ჟურნალისტების და საზოგადო მოღვაწეების. სულ დაახლოებით 500-600 ხელმოწერა იქნება", — განაცხადა ჭყოიძემ

მრგვალი მაგიდის მონაწილეებმა საქართველოს მთავრობას რუსეთთან პირდაპირი დიალოგისკენ მოუწოდეს.