ე.წ. ციანიდის საქმეზე დაკავებულ დეკანოზ გიორგი მამალაძეს გამოძიების დასრულებამდე სამღვდელო მსახურების აღსრულების უფლება შეუჩერდა. ამის შესახებ განცხადებას ბათუმისა და ლაზეთის ეპარქია ავრცელებს.

განცხადებაში ასევე ნათქვამია, რომ მეუფე იაკობს არ ჰქონდა უფლება თვითნებურად მიეღო გადაწყვეტილება დეკანოზისთვის ეპიტემიის დადებასთან დაკავშირებით:

„რაც შეეხება ბოდბელ ეპისკოპოს იაკობის მიერ ეპიტემიის (სასჯელის) დადებას, ჩვენ ღრმად ვიყავით დარწმუნებული (ეს საპატრიარქოს წარმომადგენლებმა დაადასტურეს სატელევიზიო ეთერის საშუალებით), რომ ეს იყო პატრიარქთან შეთანხმებული და მისი ლოცვა-კურთხევით, რაც სამწუხაროდ არ აღმოჩნდა სიმართლე. ეპისკოპოსმა იაკობმა თვითნებურად მიღო ეს გადაწყვეტილება, რისი უფლებაც მას არ ჰქონდა“, - ნათქვამია განცხადებაში.

შეგახსენებთ, რომ გასულ კვირას მეუფე იაკობმა, პატრიარქის ქორეპისკოპოსმა მიიღო გადაწყვეტილება დეკანოზ გიორგი მამალაძისთვის ეპიტემიის დადებასთან დაკავშირებით.