მძღოლებისთვის ჯარიმის ჩაბარების მექანიზმი იცვლება- რას აცხადებს შს მინისტრის მოადგილე

პოლიტიკა - 16:27, 27 Jun, 2017

16084

შინაგან საქმეთა მინისტრის მოადგილის შალვა ხუციშვილის თქმით მას შემდეგ რაც საგზაო მოძრაობის წესებთან დაკავშირებით ახალი სისტემა ამოქმედდება, გარდა იმისა რომ მძღოლს ჯარიმასთან დაკავშირებით შეტყობინება ფოსტის მეშვეობით გაეგზავნება ასევე იმოქმედებს სმს-შეტყობინებაც:

„ვიდეო კამერა ავტომატურად აფიქსირებს და იწერს, იმ მონაკვეთს როცა მძღოლმა წესები დაარღვია, შემდეგ ამას ჩვენ ვტვირთავთ შსს-ს ვებგვერდზე, ვისაც ინტერნეტი არ აქვს მას ფოსტით ისედაც გაეგზავნება, ამასთანავე პირველ ეტაპზე იქნება სმს, მერე შეიძლება სატელეფონო ზარიც იყოს შსს -დან, რათა შეღავათით სარგებლობა შეძლონ დაჯარიმებულებმა თუ 10 დღის ვადაში გადაიხდიან ჯარიმას." - განაცხადა ხუციშვილმა. მინსიტრის მოადგილე ვარაუდობს, რომ თავდაპირველად ვიდრე მძღოლები წესებს მიეჩვევიან ჯარიმების რიცხვი მოიმატებს.

მისი თქმით, ივლისის ბოლოდან თბილისსა და ავტობანებზე ე.წ. ჭკვიანური კამერები დამონტაჟდება, რომლებიც ვიდეომეთვალყურეობის სპეციალურ სისტემას წარმოადგენს. ხუციშვილის განცხადებით, ჭკვიანური კამერები აღჭურვილია ვიდეოანალიტიკური პროგრამული უზრუნველყოფით, რაც ეხმარება მას დააფიქსიროს ის შეცდომები, რომლებიც იმ კონკრეტული მონაკვეთისთვის არის დამახასიათებელი.