"პროკურატურა მამალაძესთან ერთად სიზმრების ნახვაშია შემჩნეული"- გვარამია "ციანიდის საქმის" მოწმის ბრალდებას პასუხობს

პოლიტიკა - 13:47, 27 Jun, 2017

3664

საქართველოდან წასული ირაკლი მამალაძე, რომელიც საუკუნის საქმის მთავარი მოწმეა, აცხადებს, რომ ცილისმწამებლური კამპანიის გამო შესაძლოა ტელეკომპანია "რუსთავი 2"-ს სასამართლოში უჩივლოს. საქმე ეხება „კურიერში“ გასულ რეპორტაჟს, სადაც შს სამინსიტროს ყოფილი მაღალჩინოსნის მიერ ციხიდან გამოგზავნილ წერილი გასაჯაროვდა. ირაკლი ფირცხალავა წერილში წერს, რომ წლების განმავლობაში ირაკლი მამალაძე უშიშროების სამსახურის აგენტი პროვოკატორი იყო.

ინფორმაციის ეთერში გასვლიდან მალევე, არასამუშაო დღეს მამალაძემ „რუსთავი2“-ს მაინც უჩივლა. „რუსთავი 2“-ის ხელმძღვანელობა თვლის, რომ ე.წ. ციანიდის საქმის მთავარი მოწმის ბრალდება აბსურდულია.

ტელეკომპანიაში აღნიშნავენ, რომ ირაკლი ფირცხალავას მიერ გამოგზავნილი წერილის მიღების შემდეგ, „რუსთავი 2“-მა ინფორმაცია თავად ირაკლი მამალაძესთან გადაამოწმა. ეთერში გასულ რეპორტაჟში მან ბრალდებას ვრცელი განცხადებებით უპასუხა და საჯაროდ უარყო.

"სისხლის სამართლის დანაშაულს შეიცავდა თუ არა ჩემი ჟურნალისტებისა და პროდიუსერების ქმედება, სიუჟეტის მომზადების დროს, მგონი ასეთ აბსურდზე პასუხის გაცემაც რთულია. საქართველოს პროკურატურამ რა სიზმრები ნახა და იგი შემჩნეულია მამალაძესთან ერთად სიზმრების ნახვაში მე არ ვიცი. ბატონი მამალაძე რას დაწერს ეს მისი საქმეა. პროკურატურა არ უნდა აკეთებდეს მყისიერ რეაგირებას, როდესაც საქმე თითიდან გამოწოვილ იდიოტიზმს ეხება. ყველას შევახსენებ, რომ რუსთავი 2 -ის სარედაქციო პოლიტიკა დაცულია სტრასბურგის სასამართლოს გადაწყვეტილებით"- აღნიშნა ნიკა გვარამიამ.