არასამთავრობოები პროკურატურას მიმართავენ. მოძრაობა „ტეთრი ხმაური“ და „საქართველოს დემოკრატიული ინიციატივა“ საგამოძიებო უწყებას შოთა პაკელიანისთვის დაზარალებულის სტატუსის მინიჭების მოთხოვნით მიმართავენ. მესამე სექტორში აცხადებენ, რომ არსებული ინფორმაცია, პროკურატურას უარის თქმის საფუძველს არ აძლევს:

„პროკურატურას კიდევ ერთხელ მივმართავთ მოთხოვნით, რომ მიანიჭონ მას დაზარალებულის სტატუსი, რაც ამ დრომდე ჩვენთვის გაუგებარი მიზეზების გამო არ მომხდარა და იმედი გვაქვს, რომ მედიაში გავრცელებული კადრების შემდეგ უფრო აქტიური იქნება გამოძიება იმ დანაშაულის გამოძიების მხრივ, რომელსაც ადგილი ჰქონდა,“ - განაცხადა შოთა პაკელიანის ადვოკატმა გიორგი მახარაძემ.

შოთა პაკელიანი მიმდინარე წლის მარტში დააკავეს. ის სამართალდამცავებს ნარკოტიკის ჩადებაში, ასევე, წამებასა და ღირსების შემლახავ მოპყრობაში ადანაშაულებს.