ცვლილებები ცენტრალური საარჩევნო კომისიის დაკომპლექტებასთან დაკავშირებით - საკითხს დეპუტატები დღეს იურიდიულ საკითხთა კომიტეტზე განიხილავენ. ოპოზიცია ცვლილებებს ხელისუფლებაზე მორგებულს უწოდებს და მიკერძოებულ გადაწყვეტილებებზე საუბრობს:

„ეს ცვლილებები აბსოლუტურად მიკერძოებულია და მორგებულია ხელისუფლების ინტერესებზე. მათ უნდათ, რომ ხალხმა ისინი უბრალოდ ვერ გადაირჩიოს. ნამდვილი აბსურდის თეატრია. ასეთია ოლიგარქია. ის ძალიან გაუგებარი თამაშის წესებით და მიკერძოებით გამორიჩევა,“ - აცხადებს „ენმ“-ის წევრი ნიკა რურუა.

„ევროპული საქართველოს“ წევრის ირაკლი აბესაძის განცხადებით, გაუგებარია თუ რატომ ხდება მმართველი გუნდის მხრიდან საარჩევნო ადმინისტრაციების დაკომპლექტების წესის შეცვლა:

„გაუგებარია, რატომ ხდება მმართველი გუნდის მხრიდან საარჩევნო ადმინისტრაციების დაკომპლექტების წესის შეცვლა, რომელიც მნიშვნელოვნად ზრდის მმართველი გუნდისთვის საარჩევნო კომისიებში წევრების რაოდენობას და შესაბამისად, შესაძლებლობას ზეგავლენა მოახდინოს საარჩევნო კომისიის მუშაობაზე. ამ მიმართულებით ეს კანონი არის მნიშვნელოვანი ხარვეზებით წარმოდგენილი,“ - ამბობს ირაკლი აბესაძე.

უმრავლესობა ოპოზიციის არგუმენტებს არ ეთანხმება:

„ქართული ოცნების“ წევრთა თქმით, იმ პარტიას, ვინც არჩევნებზე მეტ ხმას მიიღებს, ცესკოში შესაბამისად მეტი წარმომადგენელი უნდა ჰყავდეს. საპარლამენტო უმრავლესობაში ამტკიცებენ, რომ დაკომპლექტების ეს ფორმა მომავალში გადაწყვეტილებებზე გავლენას არ იქონიებს. აქ არ არის საუბარი იმაზე, რომ მხოლოდ "ქართული ოცნება" იქნება წარმოდგენილი. პირიქით, თანაბარი მონაწილეობა იქნება იმ პროპორციის მიხედვით, რომელი პროპორციაც არის არჩევნების შედეგიდან გამომდინარე. ამიტომ, ეს მგონი სამართლიანი არის, რასაც ვამბობთ და ის ცვლილებები, რომელებიც განახორციელა "ქართულმა ოცნებამ,“ - განაცხადა სოფიო კილაძემ.