„ვათავაზობთ დასავლური ღირებულებების ერთგულ ყველა ძალას, გავერთიანდეთ ამ ბრძოლაში“

„ვათავაზობთ დასავლური ღირებულებების ერთგულ ყველა ძალას, გავერთიანდეთ ამ ბრძოლაში“ - ნიკა მელია ზაალ უდუმაშვილის წარდგენაზე

პოლიტიკა - 12:21, 26 Jun, 2017

2223

„ერთიანმა ნაციონალურმა მოძრაობამ“ თბილისის მერობის კანდიდატად ზაალ უდუმაშვილი წარადგინა. წარდგენამდე ნიკა მელიამ საზოგადოებას სიტყვით მიმართა:

„ჩვენ ვაცხადებთ გადამწყვეტ ბრძოლას თბილისისთვის, ნაციონალური მოძრაობის სახელით, ვთავაზობ დასავლური ღირებულებების ერთგულ ყველა ძალას, გავერთიანდეთ ამ ბრძოლაში და ერთად დავამარცხოთ ივანიშვილის რეჟიმი თბილისში. ჩვენ ნაციონალურმა მოძრაობამ მივიღეთ სიახლით აღსავსე გადაწყვეტილება და გთავაზობთ კანდიდატს, რომელიც არ არის ჩვენი პარტიის წევრი, მაგრამ არის ჩვენი თანამოაზრე და ჩვენი გუნდის წევრი.

გადამწყვეტ ბრძოლას, თანაც დედაქალაქში, თბილისში, სათავეში უნდა ჩაუდგეს გამაერთიანებელი ლიდერი, მას უნდა უყვარდეს თავისი ქალაქი, ზრუნავდეს მასზე, დამოუკიდებლად იღებდეს გადაწყვეტილებებს და ანგარიშვალდებული უნდა იყოს მხოლოდ თბილისელების, თქვენს წინაშე და არა რომელიმე პოლიტიკური პარტიის წინაშე.

კაცი, რომელსაც წარმოგიდგენთ, უკვე არის გამარჯვებული, წლების განმავლობაში მან არაერთხელ გაიმარჯვა, გაიმარჯვა როგორც ჟურნალისტმა, როგორც პროფესიონალმა, გაიმარჯვა როგორც მოქალაქემ, ბოლოს ის ხალხთან ერთად იცავდა თავისუფალ სიტყვას და ამ უთანასწორო ბრძოლაშიც გაიმარჯვა. ის მრავალჯერ იყო გამარჯვებული წარსულში, მაგრამ მისი მთავარი გამარჯვება არის წინ, ახლა ის მოდის ქართულ პოლიტიკაში, რათა ჩვენთან ერთად, საქართველოს ყველაზე ძლიერ, შემტევ, ენერგიულ მოტივირებულ გუნდთან ერთად მოიგოს გარდამტეხი ბრძოლა თბილისისთვის და თბილისელებისთვის, ადამიანი, რომელასაც წარმოგიდგენთ მერობის კანდიდატად, თქვენთვის კარგად არის ნაცნობი, მან კარგად იცის რა პრობლემები გაქვთ, რითი ცხოვრობთ, რა გიჭირთ, ის დაიბადა და გაიზარდა თბილისში, მისი მშობლების საფლავი არის თბილისში, თბილისელებს უყვართ ის და თბილისი უყვარს მას. ჩვენი მერობის კანდიდატი და თქვენი მერობის კანდიდატი, ზალიკო უდუმაშვილი. “, - განაცხადა ნიკა მელიამ.