20 წლის ახალწვეულის ზურაბ კობალაძის საქმე - „ერთიანი ნაციონალური მოძრაობა“ 20 წლის ახალწვეულთან დაკავშირებით არსებული ვითარების დაუყოვნებლივ გამოძიებას მოითხოვს. პარტიის რიგებში აცხადებენ, რომ დანაშაულის ნიშნები იკვეთება და აუცილებელია, რომ დამნაშავე პირებმა პასუხი აგონ.

ოჯახის წევრების თქმით, ზურაბ კობალაძე სავალდებულო სამხედრო სამსახურში ჯანმრთელი წავიდა, ათ დღეში კი მძიმე ფსიქიკური აშლილობით დაბრუნდა სახლში. მათი მტკიცებით, გეგუთის ციხეში, სადაც ის მომზადებას გადიოდა, ახალგაზრდას სცემდნენ და ფსიქოლოგიურ ზეწოლას ახდენდნენ.

„მზად ვარ ოჯახს ამ საქმესთან დაკავშირებით გავუწიო ადვოკატობა. ეს არის ცალსახად დანაშაული, რაზეც დაუყოვნებლივ უნდა იქნას გამოძიება დაწყებული და დროზე უნდა გამოაშკარავდეს დამნაშავეები და ხელისუფლებამ ერთი წამით არ გაბედოს და არ დაიწყოს თავისი ჩვეული კომენტარები, რომ დაველოდოთ გამოძიებას. ეს არის საზოგადოების მაღალი ინტერესის სფერო და დაუყოვნებლივ უნდა დაიდოს გამოძიების შედეგები,“ - განაცხადა "ენმ"-ის წევრმა მირდატ ქამადაძემ.