„ნომერ პირველ ტერორისტად“ წოდებული შოთა ჭიჭიაშვილი გივი თარგამაძეს ცილისწამებაში ადანაშაულებს

პოლიტიკა - 23:36, 25 Jun, 2017

6673

90-იანი წლების ბოლოს საქართველოს ეროვნული უშიშროების მინისტრის მიერ „ნომერ პირველ ტერორისტად“ წოდებული შოთა ჭიჭიაშვილი პარტია „მოძრაობა თავისუფლებისთვის - ევროპული საქართველოს“ წევრს, გივი თარგამაძეს, ცილისწამებაში ადანაშაულებს.

ამის შესახებ ჭიჭიაშვილმა ,,პოსტსკრიპტუმთან“ ისაუბრა.

საქმე ეხება გასული წლის 4 ოქტომბერს თარგამაძეზე განხორციელებულ თავდასხმას, რომლის დროსაც დეპუტატის მანქანა ააფეთქეს. გივი თარგამაძე მასზე თავდამსხმელებზე საუბრისას აცხადებდა, რომ ფაქტთან დაკავშირებული იყო 90-იანი წლების ბანდიტური დაჯგუფების ერთ-ერთი წევრი, შოთა ჭიჭიაშვილი. თარგამაძე აცხადებს, რომ ჭიჭიაშვილი რუსულ სპეცსამსახურებთან ყოველთვის თანამშრომლობდა და 90-იან წლებში ამაზე ბევრი ადამიანი საუბრობდა.

თავად ჭიჭიაშვილი სპეცსამსახურებთან და დეპუტატის აფეთქებასთან კავშირს კატეგორიულად უარყოფს და გივი თარგამაძე ცილისწამებაში ადანაშაულებს. ის ამბობს, რომ თარგამაძეს საერთოდ არ იცნობს და მის მიმართ ,,არც კეთილგანწყობილი და ჯერჯერობით არც მტრულად არის განწყობილი“

”უსამართლობის გრძნობა მიპყრობს. რამის დაბრალება ყველანაირი საფუძვლის გარეშე უსამართლობაა და ასე არ შეიძლება. მე გივი თარგამაძის აფეთქების საქმეში არც პირდაპირი, არც ირიბი კავშირი არ მაქვს. არც შეიძლება მქონოდა. მე ამ ადამიანს არც ვიცნობ, არც არანაირი კვეთა არ მქონია მასთან, არც მტერია და არც მოყვარე, ნეიტრალურად ვარ განწყობილი მის მიმართ. ყოველ შემთხვევაში აქამდე ასე იყო”, - განაცხადა ჭიჭიაშვილმა.

ჭიჭიაშვილის ბანდის წევრების ანგარიშზეა არაერთი მკვლელობა, ძარცვა, ყაჩაღობა თუ იმ პერიოდის ყველაზე გახმაურებული კრიმინალური შემთხვევები.