„პრემიერმა ხაზი გაუსვა ყველა პოზიტიურ მომენტს რაც კონსტიტუციურ ცვლილებებში აისახა“- მამუკა მდინარაძე

პოლიტიკა - 12:35, 23 Jun, 2017

1172

ფრაქცია „ქართული ოცნების“ თავმჯდომარე მამუკა მდინარაძემ კონსტიტუციური კანონპროექტის მეორე მოსმენით განხილვის დაწყებამდე ჟურნალისტებთან განაცხადა, რომ საქართველოს პრემიერმა ძალიან კარგი განცხადება გააკეთა და ხაზი გაუსვა ყველა იმ პოზიტიურ მომენტს რაც კონსტიტუციურ ცვლილებებში აისახა.

„საქართველოს პრემიერ მინისტრმა გააკეთა ძალიან კარგი განცხადება და ხაზი გაუსვა ყველა პოზიტიურ მომენტს რაც კონსტიტუციურ ცვლილებებში აისახა და აისახება საბოლოო შედეგში, ეს იყო ადამიანის უფლებები, თავდაცვის და უსაფრთხოების საკითხები, ხელისუფლების შტოებს შორის ბალანსის ძალიან სწორად განაწილების საკითხები, ბუნებრივია, ჩვენი პოლიტიკური ოპონენტები, რომლებიც წარსულში ამ ღირებულებებს არაფრად დაგიდევდნენ და აბსოლუტურად უგულებელყოფდნენ, ვერ ეგუებიან, რომ ქვეყანაში ხდება პოზიტიური მოვლენები და დეტალურად აღნიშნავს და კარგად უხსნის საზოგადოებას. შესაბამისად, მათი მხრიდან ასეთი განცხადებები საერთოდ არ არის გასაკვირი.

მე არ მგონია ვინმეს ჰქონოდეს ილუზია იმის შესახებ, რომ ოპოზიცია მხარს დაგვიჭერდა და დადებითად შეაფასებდა რეალურად დადებით და პოზიტიურ პროცესს.

მით უმეტეს, როდესაც გეზარება ქუთაისში ყოფნა კვირაზე მეტი ხნის განმავლობაში და აზრი ეკარგება შენი აზრით ამ ყველაფერს, იმიტომ, რომ არგუმენტები აღარ გაქვს, ალბათ საუკეთესო გამოსავალია, რომ ბოიკოტი გამოაცხადო და რამენაირად ჩრდილი მიაყენო ამ პროცესს.

მიუხედავად ამისა, ჩვენ ბოლომდე მივიყვანთ ჩვენს დაწყებულ საქმეს, იმიტომ, რომ ნამდვილად ვიცით და საზოგადოებაც რწმუნდება იმაში, რომ გვაქვს შეუდარებლად კარგი კონსტიტუცია და იმაში, რომ ის ჩვენ უნდა მივიღოთ აუცილებლად,“-განაცხადა მამუკა მდინარაძემ.