სამოქალაქო სექტორი საკონსტიტუციო ცვლილებების ერთპარტიულ რეჟიმში დაჩქარებული წესით განხილვას აპროტესტებენ. მესამე სექტორი ვენეციის კომისიას, ჩრდილო ატლანტიკურ ალიანსს, დიპლომატიურ კორპუსსა და საერთაშორისო ორგანიზაციებს წერილით მიმართავენ.

მიმართვაში 20-მდე არასამთავრობო ორგანიზაცია იმ პრობლემებსა და ხარვეზებზე საუბრობს, რომელსაც მათი თქმით, საპარლამენტო უმრავლესობის მიერ მომზადებული კონსტიტუციური პროექტი შეიცავს.

„ერთადერთი ბერკეტი ზეწოლის, რაც სამოქალაქო საზოგადოებას, ყველა ჩვენგანს გააჩნია, ეს არის საერთაშორისო საზოგადოების აქტიური ჩარევა იმისთვის, რომ ეს პროცესი შეჩერდეს და საკონსტიტუციო რეფორმა დაიწყოს სწორად, დაიწყოს მაქსიმალური ჩართულობით და ყველა ის კომპონენტი, რომელიც პირდაპირ ეხება ჩვენი ქვეყნის მომავალს, იყოს კარგად აწონ-დაწონილი,“ - აცხადებს საქართველოს ატლანტიკური საბჭოს ვიცე-პრეზიდენტი ბათუ ქუთელია.

"ახალგაზრდა იურისტთა ასოციაციის" თავმჯდომარე ანა ნაცვლიშვილი ამბობს, რომ „ქართული ოცნება“ კონსტიტუციას არქმევს დოკუმენტს, რომელსაც თანხმობა არ აქვს.

„ეს განაცხადი აჩვენებს, როგორი მიმართება აქვს მმართველ ძალას საზოგადოებასთან, საზოგადოებრივ აზრთან და ზოგადად, კონსტიტუციასთან. მმართველმა ძალამ ფაქტობრივად ნულოვანი კონსენსუსის პირობებში, კონსტიტუცია დაარქვა იმას, რასაც მხოლოდ ერთი პოლიტიკური პარტია ეთანხმება,“ - განაცხადა ანა ნაცვლიშვილმა.