საკონსტიტუციო ცვლილებები - "ცვლილებების ინიცირება გარდაუვალი იყო ქვეყნის დემოკრატიული განვითარებისთვის"- პრემიერი

პოლიტიკა - 20:05, 22 Jun, 2017

2373

ამ წუთებში საქართველოს პრემიერ-მინისტრი გიორგი კვირიკაშვილი საკონსტიტუციო ცვლილებებთან დაკავშირებით განცხადებას აკეთებს.

მთავრობის მეთაური პარლამენტის მიერ დღეს საკონსტიტუციო ცვლილებების პირველი მოსმენით მიღების ფაქტს გამოეხმაურა.

კვირიკაშვილი დოკუმენტს დადებითად აფასებს და კონსენსუსის არსებობაზე ამახვილებს ყურადღებას.

მისი თქმით, ცვლილებების ინიცირება გარდაუვალი იყო ქვეყნის დემოკრატიული განვითარებისთვის.

სპეციალურ ბრიფინგზე კვირიკაშვილმა თქვა, რომ 7 წლის წინ მიღებული კონსტიტუცია ბევრ ხარვეზს მოიცავდა.

„მსურს გამოვეხმაურო ქვეყანაში მიმდინარე პროცესს საქართველოს კონსტიტუციაში განსახორციელებელ ცვლილებეს და საზოგადოებას განვუმარტო ამ ცვილებების მიზანი და მნშვნელობა. მინდა აღვნიშნო, რომ ჩვენი გუნდის მიერ ცვლილებების ინიცირება გარდაუვალი იყო ქვეყნის დემოკრატიული განვითრებისთვის. 2010 წელს განხორციელებული საკონსტიტუციო ცვლილებეიბს შედეგად ქვეყანამ მიიღო კონსტიტუცია, სადაც დაუშვებელი ნორმები იყო შეტანილი. კონსტიტუციის დაბალანსება და სრულფასოვან საპარლამენტო მოდელზე გადასვლა იყო ჩვენი გუნდის მხრიდან ცვლილებების ინიცირების მიზანი. ამიტომ შეიქმნა საკონსტიტუციო კომისია, რომლის შემადგენლობაში შედიოდნენ პოლიტიკოსები, არასამთავრობო ორგანიზაციები და დამოუკიდებელი ექსპერტები. კომისიის ფარგლებში ნებისმიერ წევრს ჰქონდა საკუთარი არგუმენტების წარმოდგენის შესაძლებლობა და თითოეულ მათგანს შეეძლო მიეღო მონაწილეობა კონსტიტუციური ცვლილებების ფორმირების პროცესში. სხვადასხვა ნორმის კონსტიტუციაში შეტანის საკითხი კი ხმათა უმრავლესობით წყდებოდა. ამასთან, რაც ყველაზე მნიშვნელოვანია, ჩატარდა უპრეცედენტო მასშტაბის საყოველთაო განხილვები და ცვლილებების შესახებ საკუთარი პოზიციის დაფიქსირების საშუალება ჰქონდა ჩვენი ქვეყნის მოსახლეობას. შემუშავებული ცვლილებები ექსპერტიზისთვის გადაგზავნილი იქნა ვენეციის კომისიაში, სადაც ცვლილებები დემოკრატიისთვის წინ გადადგმულ ნაბიჯად იქნა შეფასებული. საბოლოოდ, საკონსტიტუციო კომისიის მიერ შემუშავებული ცვლილებებით ბალანსდება და მკაფიოდ ნაწილდება პასუხისმგებლობები ხელისუფლების შტოებს შორის. პარლამენტი იძენს თავის ბუნებრივ როლს და წონას. მარტივდება პარლამენტის მიერ მთავრობისთვის უნდობლობის გამოცხადების პროცედურები. მთავრობა ხდება უფრო ეფექტური, კიდევ უფრო კონკრეტდება პრეზიდენტის, როგორც ნეიტრალური არბიტრის ფუნქციები. იზრდება ადამიანის, საზოგადოების დაცულობის ხარისხი და კონსტიტუციის გარდამავალ დებულებებში ფიქსირდება ქვეყნის საგარეო არჩევანი“, - განაცხადა კვირიკაშვილმა.