NGO სექტორი საზოგადოებრივ მაუწყებლთან დაკავშირებით მოსაზრებებს პარლამენტს წერილობით უგზავნის

პოლიტიკა - 13:09, 22 Jun, 2017

1031

სამოქალაქო სექტორი საკანონმდებლო ორგანოს საზოგადოებრივ მაუწყებელში დაგეგმილ ცვლილებებთან დაკავშირებით საკუთარ მოსაზრებებს წერილობით გადაუგზავნის. მათი მოსაზრებით საზოგადოებრივი მაუწყებლის შესახებ ინიცირებულ კანონპროექტში ბევრი საკითხი ბუნდოვნად არის გადმოცემული და შეიცავს საფრთხეს, რომ წარმოდგენილი კანონპროექტით, "საზოგადოებრივმა მაუწყებელმა" დაკარგოს თავისი მთავარი ფუნქცია- ემსახუროს ხალხს.

აღნიშნულ თემაზე მეტ განმარტებას ითხოვს ფონდ "ლიბერალური აკადემია თბილისის" დირექტორი ლაშა ტუღუში:

„ბევრი შეკითხვა და ბევრი საკითხია, რომელიც ძალიან ბუნდოვნად არის გადმოცემული ამ კანონპროექტში, ბუნდოვანია ნაწილი, რომელიც ეხება სტარტაპებს, იმიტომ, რომ გენერალურ დირექტორს აქვს შესაძლებლობა დააფინანსოს რაღაც პროექტები და მე ვფიქრობ, ესეც ცოტა უცნაურია და მეტ განმარტებას ითხოვს.“ - განაცხადა ლაშა ტუღუშმა.

"ადამიანის უფლებების სწავლებისა და მონიტორინგის ცენტრის" წარმომადგენლის თამთა მიქელაძის თქმით, საზოგადოებრივი მაუწყებელში შრომითი უფლებები პრობლემური სფეროა:

„იმ პირობებში, როდესაც ბევრი ეჭვები არსებობს იმის თაობაზე, რომ "GDS"-ის სტაფის გადაყვანა ხდება საზოგადოებრივ მაუწყებელზე და შესაძლოა მასშტაბური შრომის უფლებების დარღვევაზე ვილაპარაკოთ, ეს ცვლილება და სამეურვეო საბჭოს გაყვანა შრომითი ურთიერთობებიდან ძალიან პრობლემური სფეროა.“ - განაცხადა თამთა მიქელაძემ.