"კვირიკაშვილი ივანიშვილის დაქირავებული მენეჯერია, ნორმალურ ვითარებაში ის კონსტიტუციის ცვლილებში მთავარი მოთამაშე უნდა იყოს"- სამადაშვილი

პოლიტიკა - 12:33, 22 Jun, 2017

2177

”ნაციონალური მოძრაობის” ერთ-ერთი ლიდერი სალომე სამადაშვილი აცხადებს, რომ კვირიკაშვილი თავს ვალდებულად არ მიიჩნევს საკონსტიტუციო ცვლილებების საკითხზე ქართველი ხალხის წინაშე განმარტებები გააკეთოს.

"ნორმალურ ვითარებაში პოლიტიკური ძალის ლიდერი, რომელიც მართავს ქვეყანას და რომელსაც საკონსტიტუციო უმრავლესობა აქვს პარლამენტში, უნდა იყოს ერთ-ერთი მთავარი მოთამაშე ისეთ ფუნდამენტურ საკითხში, როგორიც კონსტიტუციის ცვლილებაა",- აღნიშნა დეპუტატმა დეპუტატმა იმ საკითხის კომენტირებისას, რომ გიორგი კვირიკაშვილი საკონსტიტუციო ცვლილებებთან დაკავშირებულ პროცესს არ გამოხმაურებია.

"რეალურად ქვეყანა არის გასული ყველა ნორმალური პოლიტიკური პროცესის ჩარჩოებიდან. ქვეყანა იმართება, როგორც კერძო კორპორაცია ადამიანის მიერ, რომელსაც არავითარი პასუხისმგებლობა არ აქვს და კვირიკაშვილი თავს არ მიიჩნევს ვალდებულად ქართველი ხალხის წინაშე, მათ შორის არც საკონსტიტუციო ცვლილებებზე და შესაბამისად, იგი არის ჩვეულებრივი დაქირავებული მენეჯერი ბიძინა ივანიშვილის მხრიდან და ანგარიშვალდებულია მხოლოდ ერთადერთ ადამიანთან, რომელსაც ჰქვია - ბიძინა ივანიშვილი. მას ჩაბარებული აქვს კონკრეტული საკითხები, რომელზეც უნდა იმუშაოს, თუმცა ის არ წარმოადგენს არანაირ პოლიტიკურ ფიგურას ამ ქვეყანაში.

რაც შეეხება საკონსტიტუციო პროცესს, ბიძინა ივანიშვილს დაქვემდებარებულ სხვადასხვა ჯგუფებს შორის, როგორც ჩანს, არის აზრთა სხვადასხვაობა კონსტიტუციის მოდელთან დაკავშირებით. პრემიერი კვირიკაშვილი არ აფიქსირებს თავის აზრს, რადგან, როგორც ჩანს, მას სურს, რომ ჩრდილში იყოს და ღიად და აშკარად არ დაიკავოს არც ერთი დაჯგუფების პოზიცია. ეს აჩვენებს, რომ იგი არის სრულიად უსუსური პოლიტიკური ფიგურა და რეალურად, ქვეყანას არ ჰყავს არც მთავრობა და არც რეალური პოლიტიკური მმართველი ძალა. შედეგად მივიღეთ ის ბაკქანალია, რაც მივიღეთ საკონსტიტუციო პროცესის სახით”, - განაცხადა სამადაშვილმა.