„ყველა ტრიბუნა უნდა გამოვიყენოთ იმისათვის, რომ ამ ხელისუფლებამ მავნებლობისთვის დიდი ფასი გადაიხადოს“- რატომ არ შეუერთდა ბოკერიას გუნდი ბოიკოტს

პოლიტიკა - 17:51, 21 Jun, 2017

1351

„ევროპული საქართველოს" ლიდერმა პარლამენტში მიმდინარე საკონსტიტუციო განხილვებთან დაკავშირებით „იმედის“ ეთერში ისაუბრა, გიგა ბოკერიამ განმარტება იმის შესახებ გააკეთა, თუ რატომ არ შეუერთდა მისი პოლიტიკური ძალა ენმ-სა და „პატრიოტთა ალიანსის“ მიერ გამოცხადებულ ბოიკოტს;

„ჩვენ ვიყენებთ საპარლამენტო ტრიბუნას საზოგადოებასთან ურთიერთობისთვის და იმ წნეხისთვის, რომელიც საზოგადოების მხრიდან უნდა წამოვიდეს ხელისუფლებაზე და რაც დღითიდღე იზრდება. სამწუხაროდ ეს ყველაფერი დღეს ვერ მოგვცემს შედეგს, ამის ილუზია არავის არა აქვს, მაგრამ ჩვენი მოვალეობაა ყველა ტრიბუნა გამოვიყენოთ იმისათვის, რომ ამ ხელისუფლებამ რაც შეიძლება დიდი ფასი გადაიხადოს ამ მავნებლობისთვის, რომელსაც ჩვენი ქვეყნის ინტერესების წინააღმდეგ ჩადიან.

პროცედურული ომით ამის შეჩერება ვერ მოხერხდება, არც ამის ილუზია არ უნდა გვქონდეს, ჩვენ ყველა აქტიურმა მოქალაქემ და პოლიტიკურმა ძალამ უნდა გამოიყენოს იმისთვის რომ ხელისუფლებას ქონდეს მაქსიმალური დისკომფორდი. მე დარწმუნებული ვარ რომ გარდაუვალია ხელისუფლების შეცვლა არჩევნების გზით. ხელისუფლებამ ამ პროცესებით აჩვენა, რომ მათი მიზანია ძალაუფლების შენარჩუნება ნებისმიერი გზით, მათ შორის ქვეყნისთვის ზიანის მიყენების ფასადაც. ამის მაგალითია კონსტიტუცია, ორი სიტყვით რომ შევაფასოთ, მივიღეთ ის რომ მოქალაქეებს წაართვეს პრეზიდენტის არჩევის უფლება, ვენეციის კომისიის რეკომენდაციების საწინააღმდეგოდ შეინარჩუნეს სისტემა, რომლის შეცვლასაც თავად მოითხოვდნენ, როდესაც ოპოზიციაში იყვნენ, მერე პირობა დადეს ათასჯერ, რომ შეცვლიდნენ, მომავალშიც მახინჯ ბონუსურ სისტემაზე გადასვლას გეგმავენ. უარი თქვეს პლებისციტთან დაკავშირებით ჩვენს ინიციატივაზე, რომ ხალხის აზრი ეკითხათ. ვერ მიაღწიეს ვერავისთან თანხმობას, არც კი უნდათ რომ საზოგადოების აზრი იცოდნენ. პოლიტიკური უტიფრობის მაგალითებს იძლევიან, განაცხადეს მონარქიის თუ ბატონყმობის აღდგენაზე პლებისციტი ჩავატაროთო და პრეზიდენტის არჩევაზე არ უნდათ ხალხის აზრის კითხვა.“- განაცხადა გიგა ბოკერიამ.

მისი თქმით მოქმედი ხელისუფლება შესაძლოა ისტორიაში და სახელმძღვანელოებში იმ პრინციპით შევიდეს, თუ როგორი არ უნდა იყოს მთავრობა.