საქართველოს უმაღლეს საკანონმდებლო ორგანოში დეპუტატები საკონსტიტუციო ცვლილებებს პირველი მოსმენით განიხილავენ. კანონმდებლები პარლამენტის თავმჯდომარეს კითხვებს უსვამენ. კითხვა-პასუხის რეჟიმის დაწყებამდე ირაკი კობახიძემ დეპუტატებს ძირითადი პუნქტდები გააცნო.

ირაკლი კობახიძის განცხადებით, საკონსტიტუციო ცვლილებებს ორი ძირითადი მიზანი ჰქონდა, ერთი არის დახვეწილი სისტემის მიღება, მეორე კი ქვეყნის უზენაესი დოკუმენტის სამართლებრივ პრინციპებთან შესაბამისობაში მოყვანა.

„ჩვენ გადავწყვიტეთ, რომ ძალიან მკაცრი ზღვარი დაგვეწესებინა ბონუსისთვის, ზღვარი არის სამი სახით დაწესებული, სამივე არის კუმულაციური ფორმით წარმოდგენილი კონსტიტუციის შესაბამის მუხლში, პირველი ეს არის აბსოლუტური ზედა ზღვარი, რაც ნიშნავს იმას, რომ ბონუსის ხარჯზე პარტიამ არ უნდა მიიღოს 89 მანდატზე მეტი, მეორე ეს არის ფარდობითი ზედა ზღვარი, რაც ნიშნავს იმას, რომ ძირითადი მანდატების 35%-ს არ უნდა გადააჭარბოს დამატებითი მანდატების რაოდენობამ, ძირითადი მანდატების სახით თუ პარტია იღებს 40%-ს, ამ შემთხვევაში ის ბონუსის სახით ვერ მიიღებს მანდატების 54%-ზე მეტს, მესამე ეს არის აბსოლუტური ქვედა ზღვარი, რაც ნიშნავს იმას, რომ თუ აბსოლუტურ უმრავლესობამდე 76 ხმამდე არ ევსება პარტიას ბონუსის ხარჯზე მანდატები, ამ შემთხვევაში ბონუსი აზრს კარგავს, ბონუსის ათვლა იწყება 38%-დან და ძირითად აქტუალობას იძენს 38-დან 44 მანდატის ინტერვალში.

რაც შეეხება საქართველოს პრეზიდენტს, პრეზიდენტის სტატუსი, უფლებამოსილებები, არჩევის წესი, ეს სამი საკითხი უნდა მიმოვიხილოთ, სტატუსი რჩება უცვლელი, პრეზიდენტი კვლავ არის სახელმწიფოს მეთაური, უმაღლესი მთავარსარდალი და წარმომადგენელი ქვეყნის საგარეო ურთიერთობებში, პრეზიდენტის კომპეტენციების კუთხით, ჩვენ არ გვაქვს არსებითი ცვლილებები, არის ორი მნიშვნელოვანი ცვლილება, ერთი, საქმე ეხება უზენაესი სასამართლოს წევრების წარდგენის კომპეტენციას და მეორე ეხება საქმე ეროვნული უშიშროების საბჭოს, ეროვნული უშიშროების საბჭო დღეს არის აბსოლუტურად არაქმედითი ორგანო, რისი მიზეზიც არის დღევანდელი კონსტიტუცია, აბსოლუტურად არასწორი ფორმით არის მოწესრიგებული ეროვნული უშიშროების საბჭოს კომპეტენციები, ეროვნული უშიშროების საბჭო რჩევას აძლევს პრეზიდენტს ისეთ საკითხებთან დაკავშირებით, რომელიც შედის მთავრობის გამგებლობის სფეროში. საკონსტიტუციო ცვლილებები ამოქმედდება ახლადარჩეული პრეზიდენტის მიერ ფიცის დადების მომენტიდან. რაც ნიშნავს იმას, რომ 2018 წელს საქართველოს პრეზიდენტი აირჩევა პირდაპირი წესით“, - განაცხადა ირკლი კობახიძემ.

პარლამენტის დარბაზში საპარლამენტო ოპოზიციიდან მხოლოდ „ევროპული საქართველოს“ იმყოფება, „ნაციონალურმა მოძრაობამ“ და „პატრიოტთა ალიანსმა“ ბოიკოტი გამოუცხადა სხდომას.