"ვისმენთ შეურაცხყოფას, ცილისწამებას, კობახიძის მხრიდან მარგველაშვილთან მიმართებით საუბარი კომიკურია"- ჩიხრაძე

პოლიტიკა - 09:00, 21 Jun, 2017

1607

საქართველოს პრეზიდენტის მრჩეველი პოლიტიკურ საკითხებში, ფიქრია ჩიხრაძე, ირაკლი კობახიძეს პრეზიდენტის ინსტიტუტის შეურაცხყოფაში ადანაშაულებს.

„ვისმენთ შეურაცხყოფას, ვისმენთ ცილისწამებას, ვისმენთ აბსოლუტურად უსაგნო პოლემიკას, მათ შორის, კონსტიტუციის საკითხებთან დაკავშირებით. იყო ლაპარაკი, თითქოს, ტყუილები, თითქოს, ასე ვთქვათ, შიში და ა.შ. ძალიან კომიკურია ასეთ თემებზე საუბარი მარგველაშვილთან მიმართებაში,“ - აცხადებს ფიქრია ჩიხრაძე.

მისი თქმით, პარლამენტის თავმჯდომარეს განსხვავებული მოსაზრებების მიუღებლობა აქვს.

„კონსენსუსი ჰგონია ის, რომ მხოლოდ მისი ან მმართველი პარტიის წარმომადგენელთა აზრზე უნდა ხდებოდეს თანხვედრა და აზრის კონსოლიდაცია და არაფრით არ შეიძლება, რომ შემხვედრი ნაბიჯები გადაიდგას სხვისი აზრისკენ,“ - განაცხადა ფიქრია ჩიხრაძემ.

ფიქრია ჩიხრაძის განცხადებით, "ვენეციის კომისიას" პარლამენტის არჩევის სისტემასთან დაკავშირებით სერიოზული შენიშვნები ჰქონდა და შედეგად, მმართველმა გუნდმა შერეული მოდელი ძალაში დატოვა.

„7 წლითა და რამდენიმე თვით საქართველოს გადავუვადეთ კიდევ ერთხელ უფრო დემოკრატიული, უფრო სამართლიანი სისტემის შემოღება... ჩვენ შეიძლება, მივიღოთ მოდელი, რომელიც საფრთხეს უქმნის პოლიტიკის წარმოებას საქართველოში. ჩვენ შეიძლება, ჩუმი ავტორიტარიზმის მდგომარეობაში აღმოვჩნდეთ და ხვალ, ზეგ დამაბალანსებელი ინსტრუმენტებიც არ არსებობდეს,“ - განაცხადა ფიქრია ჩიხრაძემ.