"პრეზიდენტმა დაიწყო დესტრუქციით და ამთავრებს დესტრუქციით“ - კობახიძე მარგველაშვილს პარლამენტის წინააღმდეგ ბრძოლაში ადანაშაულებს

პოლიტიკა - 10:34, 21 Jun, 2017

1319

პარლამენტი დღეიდან საკონსტიტუციო ცვლილებების განხილვას იწყებს. პრეზიდენტის უარის მიუხედავად საკანონმდებლო ორგანოში რიგგარეშე სესია მაინც გაიმართება, სხდომა 13:00 საათზეა ჩანიშნული.

პარლამენტის თავმჯდომარის თქმით, ახალი კონსტიტუცია ქვეყანაში დემოკრატიის განვითარებას შეუწყობს ხელს, ირაკლი კობახიძემ პრეზიდენტი საკონსტიტუციო რეფორმაზე განსხვავებული მოსაზრების ქონის გამო დესტრუქციულ ქმედებებში დაადანაშაულა და განაცხადა, რომ ის პარლამენტს კიდევ ერთხელ დაუპირისპირდა:

„იმართება პარლამენტის რიგგარეშე სხდომა, პარლამენტს აქვს ამის უფლება მიუხედავად იმისა, რომ პრეზიდენტი კიდევ ერთხელ დაუპირისპირდა საქართველოს პარლამენტს. პრეზიდენტმა დაიწყო დესტრუქციით, მან დაიწყო დაპირისპირებით კომისიის წინააღმდეგ და ის ამთავრებს დესტრუქციით,“- განაცხადა ირაკლი კობახიძემ.

საკონსტიტუციო ცვლილებების დაჩქარებულ რეჟიმში განხილვის წინააღმდეგ გამოდის ოპოზიციაც. მათი თქმით, ხელისუფლებამ საზოგადოება მოატყუა და მიუხედავად იმისა, რომ ცვლილებებს არ ეთანხმებიან არც პოლიტიკური პარტიები, არც არასამთავრობო სექტორი და არც საზოგადოება, ამ ახალ პროექტს მაინც განიხილავს.

„მათ მოატყუეს ხალხი, მოატყუეს პოლიტიკური პარტიები, მოიმიზეზეს რაღაც ბუნტი მაჟორიტარებსა და არამაჟორიტარებს შორის. ყველაფერი თურმე მიმართული ყოფილა პრეზიდენტის ხმოსნების მიერ არჩევნებისაკენ,“-განაცხადა ერთიანი ნაციონალური მოძრაობის წევრმა რომან გოცირიძემ.

მიუხედავად იმისა, რომ საკონსტიტუციო ცვლილებებს ბოიკოტს უცხადებს "პატრიოტთა ალიანსიც," ისინი დღევანდელ სხდომას მაინც დაესწრებიან.