რიგგარეშე სხდომის ჩატარება - უმრავლესობა გადაწყვეტილებას დღეს ბიუროს სხდომაზე მიიღებს

პოლიტიკა - 18:17, 20 Jun, 2017

1233

ქართული ოცნება რიგგარეშე სხდომის ჩატარების თაობაზე გადაწყვეტილებას დღეს ბიუროს სხდომაზე მიიღებს. სხდომა 20:00 საათზეა ჩანიშნული.

მას შემდეგ რაც საქართველოს პრეზიდენტმა პარლამენტს რიგგარეშე სხდომის ჩატარებაზე უარი უთხრა, პროცედურის მიხედვით, პარლამენტს თავად აქვს უფლება, მიიღოს სხდომის ჩატარების გადაწყვეტილება.

„პრეზიდენტის თანხმობა არ არის აუცილებელი იმისათვის, რომ ჩატარდეს სხდომა რიგგარეშე. ამას ითვალისწინებს რეგლამენტი, შესაბამისად, ჩვენ ჩავატარებთ სხდომას ხვალ,“ - განაცხადა პარლამენტის ფრაქცია „ქართული ოცნების“ თავმჯდომარემ, მამუკა მდინარაძემ.

მისი თქმით, პრეზიდენტის უარის შემდგომ 48 საათი გასულია.

პარლამენტის ფრაქცია ”ქართული ოცნება - მწვანეების” თავმჯდომარის მოადგილე, ზაზა გაბუნია, აცხადებს, რომ რიგგარეშე სხდომა, რომელზეც საკონსტიტუციო ცვლილებები პირველი მოსმენით უნდა განიხილონ, ხვალ, 12 საათზე დაინიშნება.

„არაფერი არ იცვლება ამ თვალსაზრისით. პრეზიდენტმა გამოიყენა თავისი უფლება, რიგგარეშე სხდომის დანიშვნის შესახებ. სამწუხაროა, რომ ეს პოლიტიკური შეფერილობა ახლავს ამ გადაწყვეტილებას იმიტომ, რომ ამ გადაწყვეტილებით მან იერიში მიიტანა არა უმრავლესობის ნებაზე, რომ დავიწყოთ განხილვა, არამედ კონსტიტუციაზე,“ - განაცხადა ზაზა გაბუნიამ.

საქართველოს პრეზიდენტი საკონსტიტუციო ცვლილებებთან დაკავშიერებით პარლამენტის რიგგარეშე სხდომის მოწვევაზე უარს აცხადებს. აღნიშნული განცხადება გიორგი მარგველაშვილმა პარლამენტის მიმართვის საპასუხოდ გააკეთა.