ადგილს სადაც სტალინის ძეგლი 60 წელზე მეტ ხანს იდგა, ევროპის მოედანს არქმევენ

პოლიტიკა - 20:20, 19 Jun, 2017

4079

ქ. გორში, ცენტრალური მოედნისთვის სახელის დარქმევის ინიციატივით საკრებულოს დეპუტატი გამოდის. „ნიუპოსტის“ კორესპონდენტის ცნობით, თამარ თედლიაშვილი „ევროპის მოედნის“ დარქმევას იმ ადგილისთვის ითხოვს, სადაც სტალინის ბრინჯაოს მონუმენტი 60 წელზე მეტ ხანს იდგა. თედლიაშვილმა უსახელო მოედნისთვის სახელის დარქმევის ინიციატივით საკრებულოს წერილობით უკვე მიმართა. თედლიაშვილი საკუთარი ინიციატივის მთავარ არგუმენტადსაქართველოს მოქალაქეების გაცხადებულ არჩევანს ასახელებს, ქვეყნის საგარეო კურსთან დაკავშირებით. წერილში რომელიც მან საკრებულოს მიწერა, რკინიგზის სადგურის დასახლებაში, ქარხნის ქუჩის სახელის, ანა სოლოღაშვილის სახელით ჩანაცვლებასაც მოითხოვს. გორის მერი აცხადებს, რომ საკითხი მეტად სენსიტიურია და საჯარო დისკუსიებს მოითხოვს. თამარ თედლიაშვილის ინიციატივაზე თავდაპირველად გორის საკრებულოს სივრცითი ტერიტორიული დაგეგმარებისა და ინფრასტრქუტურის კომისიამ უნდა იმსჯელოს. მოწონების შემთხვევაში კი საკითხი სამთავრობო სახელდების კომისიაში გადავა, რომელიც შესაბამის დასკვნას დადებს. საბოლოო გადაწყვეტილებას კი საკრებულოს წევრები მიიღებენ, რომლებმაც ერთხელ უკვე ისტორიული გადაწყვეტილება მიიღეს და 2010 წელს, გორის ცენტრიდან აღებული ძეგლის ქალაქში დაბრუნების საკითხზე უარი განაცხადეს.