"ეს საკითხი არ არის არც დღეის და არც ხვალის"- პრემიერი კონსტიტუციურ მონარქიაზე

პოლიტიკა - 19:03, 19 Jun, 2017

1377

საქართველოს პრემიერ-მინისტრის თქმით, პატრიარქის განცხადების და საკონსტიტუციო ცვლილებების დაკავშირება ერთმანეთთან არასწორად მოხდა. კვირიკაშვილის თქმით საკონსტიტუციო მონარქიაზე მსჯელობა დღეს არ მიმდინარეობს და ამ საკითხს შესაძლოა ათწლეული დასჭირდეს. პრემიერის განცხადებით ასეთი საკითხის გადაწყვეტა უნდა მოხდეს ფართო საზოგადოებრივი კონსენსუსით და არა ნაჩქარევი გადაწყვეილებით:

„რამდენად მე ვუსმენდი კომენტარებს, ძირითადად ოპოზიციის, მოხდა არასწორად დაკავშირება პატრიარქის განცხადების საკონსტიტუციო ცვლილებების პროცესთან. არანაირი კავშირი ამ ორ საკითხს შორის არ არსებობს. საკონსტიტუციო ცვლილებები, რომელზეც ვმუშაობთ, არის ძალიან მნიშვნელოვანი, დემოკრატიული განვითარების პროცესისთვის ძალიან წინგადადგმული ნაბიჯი.

რაც შეეხება პატრიარქის განცხადებას, ჩვენ პატრიარქის უდიდესი პატივისცემა გაგვაჩნია, მე მინდა, მას მადლობა გადავუხადო იმისათვის, რომ ძალიან ბევრს ფიქრობს ქვეყნის მომავალზე. ეს საკითხი, როგორც პატრიარქმაც ბრძანა, არ არის არც დღეის და არც ხვალის, ამ საკითხის გადაწყვეტას შესაძლოა, დასჭირდეს ათწლეული ან უფრო მეტი, ან ნაკლები. ამაზე დღეს მსჯელობა არ არის, მაგრამ რა თქმა უნდა, ეს განცხადება არის საკმაოდ საინტერესო. ვფიქრობთ, რომ ფართო საზოგადოებრივი ჩართულობით ასეთი მსჯელობა რომ შედგეს, ეს იქნება ძალიან დადებითი. ასეთი საკითხის გადაწყვეტა უნდა მოხდეს ფართო საზოგადოებრივი კონსენსუსით, მხოლოდ და მხოლოდ და ნაჩქარევი გადაწყვეტილებები არ გვმართებს.“ - განაცხადა პრემიერმა.