გელა მიქაძე საქალაქო სასამართლოს გადაწყვეტილებას ლონდონის სასამართლოში გაასაჩივრებს

პოლიტიკა - 17:27, 17 Jun, 2017

1504

„პატრიოტთა ალიანსის“ წევრი გელა მიქაძე საქალაქო სასამართლოს იმ გადაწყვეტილებას, რომელიც მუხროვანის მიწებთან დაკავშირებით ხელშეკრულების გაუქმებას და ასევე სასამართლო ბაჟის გადახდაზე იქნა მიღებული, სააპელაციო სასამართლოში გაასაჩივრებს.

მისი განცხადებით, იმავე მოსამართლემ კომპანია „რაკიას“ დააკისრა რამდენიმე მილიონის გადახდა და ეს უკავშირდება „თბილისი მოლის“ კომერციულ ფართებს.

დეპუტატი ამბობს, რომ „რაკიათან“ ლონდონის სასამართლოებში გააგრძელებს დავას. მისივე ინფორმაციით, ლონდონის უზენაესმა სასამართლომ უკვე გამოიტანა გამამტყუნებელი განაჩენი და „რაკიას“ ერთი მილიონის გადახდა დააკისრა.

„რაკია ჯორჯიას“ მიერ დღეს გავრცელებულ ინფორმაციასთან დაკავშირებით მინდა განვაცხადო შემდეგი:

1. კატეგორიულად არ ვეთანხმები თბილისის საქალაქო სასამართლოს მიერ გუშინ გამოტანილ გადაწყვეტილებას და დარწმუნებული ვარ, რომ სააპელაციო სასამართლო მხედველობაში მიიღებს ყველა იმ მტკიცებულებას, რომელიც არ იქნა გათვალისწინებული პირველ ინსტანციაში საქმის განხილის დროს. „რაკია ჯორჯია“ თავის განცხადებაში ცდილობს საზოგადოება შეიყვანოს შეცდომაში და გააცნოს საქმის მხოლოდ ის გარემოებები, რომლებიც მას აწყობს და არასრულად ასახავს მთელ მთელ იმ ისტორიას, რომელიც სადავო ქონებას ეხება. ამასთან, მათ რატომღაც „გამორჩათ“, რომ გუშინ თბილისის საქალაქო სასამართლოში „რაკია ჯორჯიამ“ წააგო კიდევ ერთი მრავალმილიონიანი საქმე, რომელიც სხვა სადავო აქტივებს ეხებოდა.

2. ჩემსა და რაკიას შორის არსებული დავა ასევე განიხილება ლონდონის სასამართლოში, სადაც ერთი პროცესი უზენაესი სასამართლოს ჩათვლით უკვე მოგებული მაქვს და რაკიას უკვე დაეკისრა ჯარიმა დაახლოებით 1 მილიონი დოლარის ოდენობით. ხოლო მეორე პროცესი ლონდონის სასამართლოს პირველ ინსტანციაში ასევე დასრულდა ჩემს სასარგებლოდ და ამჟამად განიხილება აპელაციაში.

3. მე ყოველთვის ვცდილობდი, ვიდრე კანონიერ ძალაში არ შევიდოდა სასამართლოს გადაწყვეტილებები, თავი შემეკავებინა მოწინააღმდეგე მხარისთვის საჯარო მიმართვისაგან და მითუმეტეს, შეურაცხყოფის მიყენებისა და ცილისწამებისაგან (რასაც ვერ ვიტყვით რაკიას მხარეზე). მაგრამ, რადგან პროცესები სხვა მიმართულებით განვითარდა, მე მზად ვარ და ვთავაზობ რაკიას ჩვენს შორის არსებული ყველა სადავო საკითხი განხილულ იქნეს ლონდონის საარბიტრაჟო პალატაში, რომელსაც საუკუნოვანი გამოცდილება და აბსოლუტურად მიუკერძოებელი რეპუტაცია აქვს ასეთი სირთულის ბიზნეს დავების განხილვაში”, - აცხადებს მიქაძე.

"რაკია ჯორჯია"- ს ინფორმაციით, დეპუტატი გელა მიქაძე თბილისის საქალაქო სასამართლომ დამნაშავედ ცნო.